Алматы ЖОО-нда “Парасыз сессия” акциясы өтуде
Біліміңді парасыз дәлелде. Сыбайлас жемқорлықпен күрес мемлекеттік бағдарламасын жүзеге асыру аясында “Парасыз сессия” акциясы өтіп жатыр.
Осындай шаралардың бірін «Нұр Отан» партиясының Медеу аудандық филиалы Мемлекеттік қызмет істері және жемқорлыққа қарсы күрес департаментімен бірігіп, студенттер арасында өткізді. Шараға мемлекеттік емес ұйымдар да ат басын бұрыпты. Негізгі мақсаты - қоғамды сыбайлас жемқорлыққа қарсы күрес жүргізуге, оқытушы мен оқушы арасындағы қарым-қатынасты жөндеуге бағытталған.
«Медеу ауданында орналасқан жоғары оқу орындары студенттерімен кездесу болып жатыр. Бұған прокуратура қызметкерлері, жемқорлыққа қарсы агенттіктен келіп отыр. Бұл біздің университетте осы болған жағдай жалғасы деп білеміз. Бізде бұл шара жыл бойы өтіп отырады»,- деді Абай атындағы ҚазҰПУ тәрбие істері жөніндегі проректоры Жанатбек ІШПЕКБАЕВ.
Жиында студенттер мазалап жүрген сауалдарын құзырлыларға қойды. Ұсыныстарын да айтты. «Білім беру жүйесінде жемқорлықты түп-тамырымен жою - жоғары білікті мамандарды дайындауға септігін тигізеді»,- дейді ізденушілер. Осы мақсатта студенттер сауалнамалар жүргізіп, тіпті жемқорлыққа қарсы топты да құрыпты.
almaty.tv
