Әдебиет пен мәдениет қай кезде де достыққа қызмет еткен
Мемлекет басшысының еліміздің басты рухани құндылықтары айқын көрініс тапқан, мазмұны терең, ауқымы кең, ұлт руханиятын ғасырлар биігіне көтеретін «Болашаққа бағдар: рухани жаңғыру» мақаласының бір жылдығын қорытындылаған басқосулар жер-жерде асқан ұйымшылдықпен аталып өтуде. Осы маңызды бағдарламалық құжатқа арналған үлкен жиын Алматы қаласының Әуезов ауданында Абдулла Розыбақиев атындағы №153 мектеп-гимназияда да өтті.
«Ұлттар достығы – татулықтың тал бесігі» немесе «Әдеби достық – мәңгілік достық» деп аталған бұл шоу-кештің өзгелерден ерекшелігі поэзиялық үлгіде жүргізілгендігінде болды.
Егемен еліміздің басты байлығы – халықтар достығы. Қазақстан көптеген ұлттың Отаны болып саналады. Қазақстанда әр халықтың, кез-келген ұлт өкілінің өз үні естіліп тұрады. Өздеріне деген осындай адал да ашык қарым-қатынасты көрген түрлі халықтың өкілдері ана тілін, діні мен мәдени дәстүрін қайта өркендетіп, тәуелсіз демократиялық Қазақстанды құру жолына белсене араласуда.
Поэзия кешіне Алматы қалалық мәслихат депутаттары, саясаттанушылар, ақын-жазушылар, №153 және №123 мектеп-гимназиялардың оқушылары қатысты.
Бірінші бөлім «Поэзия құдіреті» ток-шоуымен басталды.
«…Бір кісі бармақтай құсты ұстап алып, торға қамап қояды. Тұтқын құс күні-түні дамыл көрмей «Отан», «Отан», «Отан» деп шырылдай береді. Құстың иесі: «Мұның да Отаны болғаны ма, ал Отаны болса қайда екен? Мен бұл құсты ұшырып жіберейін де, ұшқан жағына қарап, ғажайып елге апаратын жолды біліп алайын» деп ойлайды. Сөйтіп, торды ашып, құсты босатып жібереді. Құс ұшып шығып, бар болғаны 10 қадам жердегі тастақты тақырға өскен жалғыз түп тікенге барып қонады. Сөйтсе, әлгі бұтада ұясы бар екен. Демек, құстың Отаны ұя салған жері болды ғой деп ойлайды жаңағы адам. Шынында да, адам түгілі құстар да ұя салып, мекендеген жеріне бауыр басып кетеді екен! Туған жердей жат елдің болмайтыны ақиқат. Менің Отаным – Тәуелсіз Қазақстан!..». 5-сынып оқушысы Феруза Якупова кеште осындай аңызға құрылған әңгіме айтып берді. Құс екеш құсқа да Отан керек, бостандық керек… Балғын қыздың әңгімесі жиналғандарды бір сәт тебірентіп, ой құшағына бөледі.
Алматы қалалық мәслихат депутаттары сөз алды. Бүгінгі іс-шараның өтуіне қолдау көрсеткен филология ғылымының докторы Кенжехан Матыжанов пен «Алматы ақшамы» газетінің бас редакторы Қали Сәрсенбай ортаға шықты.
Кенжехан Слямжанұлы: «Кештің әдеби деп аталуы өте дұрыс екен. Әдебиет пен мәдениет, жалпы өнер қай кезде де достыққа қызмет еткен» деп бастап, ары қарай әңгімесін достық тұрғысында өрбітті.
– Әлгі оқушы қыз айтқан әпсана әбден ой елегінен өткен, талайдың санасына серпін берген, намысын жаныған, сөйтіп бүгінгі біздің тәуелсіздік заманымызға жеткен саф алтындай сара сөз ғой. Менің де ертегі айтқым келіп тұр. Ертеде бір ел болыпты. Ол елдің адамдары бірін-бірі мінеу-сынауды, балағаттау дегенді мүлде білмейді екен. Мұның сыры неде екен деп өзгелер таңдай қағысыпты. Сөйтсе, ол елдің халқы тек қана әдебиет оқиды екен. Міне, әдебиеттің, яғни көркем сөздің құдіреті деген осы болса керек. Елбасымыздың рухани жаңғыруын, сананың тазалығын, тілі, ділі, діні, бүгінгі Отаны ортақ екі ұлттың қазіргісі мен келешегін бұдан да жарқын ету үшін жүкті әдебиетке жүктеу, оның ішінде өлеңге сенім арту өте орынды таңдау, – деді Қали Қошқарұлы.
Сөз Қазақстан Жазушылар одағы Ұйғыр бөлімінің жетекшісі, жазушы Ахметжан Ашириге берілді.
– Кез келген тіл өзге тілмен қарым-қатынасқа түскенде ғана өсіп-өркендейді.
Біздің қоғамда әр түрлі мәдени элементтер бір-бірімен біріккен, олар бірін-бірі толықтырып, біріне-бірі нәр беріп тұрады. Біз осы құндылықтарды болашақ ұрпаққа қаз-қалпында бояуын бұзбай, қарқынын бәсеңдетпей жеткізуге тиіспіз.
Қазақстан. Құшағы ыстық, құлашы кең байтақ өлке. 130-дан астам ұлт өкілінің бір атаның баласындай ырыс пен ынтымақта өмір сүріп келе жатқандығы бәрімізге айқын. Осыншама ұлт пен ұлыстың өкілі бірге тұрып, бірге жасап, бір мақсатқа жұмылып, өмір сүріп келе жатқаны Елбасымыздың дана саясатының нәтижесі болса керек.
Қазақ-ұйғыр әдебиеттерінің достығы ұзақ жылдан келе жатыр. Біз негізі тіліміз мен діліміз және дініміз бір болумен қатар, тағдырымыз да, тарихымыз да ортақ халықпыз. Мәселен, Һезим Искәндәров пен Сәбит Мұқановтың, Һезмәт Абдуллин мен Қуандық Шаңғытбаевтың, Илия Бәхтия мен Мұқағали Мақатаевтың, Маһмут Абдрахманов пен Қадыр Мырза Әлидің достықтары, әріптестік байланысы көпке үлгі. Сонымен қатар, Қабдеш Жұмаділов, Жәркен Бөдеш, Жанат Ахмади, Дәулетбек Байтұрсынұлы ұйғыр әдебиетінің қазақ тіліне аударылуына көп күш салған қаламгерлер.
Мәскеу шаһарынан келген мейман, шайыр, Островский сыйлығының лауреаты Вильям Садыков, Қазақстан Жазушылар одағының мүшесі, Түрксойдың «Мақтумқұлы Фраки» медалінің лауреаты, Ильхам сыйлығының иегері Дәулетбек Байтұрсынұлы кеште екі халықтың әдеби және мәдени достығы туралы, аударма мәселесіне қатысты келелі пікірлерін ортаға салды.
– Абайдың даналығы, Әуезовтің ғұламалығы, Жамбылдың жырлары мен Құрманғазының күйлері, Жүсіп Баласағұн, Махмут Қашқаридың терең философиясы, Илия Бәхтияның лирикаға толы өлеңдері, Зия Сәмәдидің тарихи романдары – ғасырлар қойнауынан жеткен бабалар үні. Бұлар біздің рухани мәдениетіміздің бір парасы ғана. Рухани жаңғыру ұлттық сананы дәуір талабына сай қайта түлетіп, жарастыратын құдіретті күш. Бұл – тарау-тарау тарихтың жасампаз бүгіні мен жарқын болашағын үйлестіретін, сабақтастыратын ұлт жадының тұғырнамасы, – деді кеш иесі, Абдулла Розыбақиев атындағы №153 мектеп-гимназиясының директоры, Алматы қалалық мәслихат депутаты Шавкат Омаров қонақтарға қаратып айтқан сөзінде.
Кезек құдіретті поэзияға берілді. «Отан», «Көктем», «Махаббат», «Достық» тақырыбында өлеңдер оқылды. «Еркін микрофон» әдісімен пікір алмасу, қонақтарға сұрақтар қою жүзеге асырылды.
Көктеммен бірге бүрлейін…
Қайдағы құстың ғашық бір әні,
Кеудеме бұққан ашып тұманы.
Басыңнан сипар бақытың бар деп
Бақтарға қарай асықтырады.
Асығам баққа, асығам қырға,
Аңсарым менің асыл ән-жырда.
Көк өрім көктем арбайды мені,
Тамыры толы тасыған нұрға.
Белдерден белге сабылысып әр,
Сәуір ғой мынау, сағым ұшынар.
Сарғалдақ құсым сайрайды менің,
Орманға деген сағынышы бар…
Ақ бұлттан аппақ түсінік табам,
Айта алмай бәрін қысылып барам.
Билейік дейді қайыңның биін,
Ақ самал қолын ұсынып маған.
Айнала толы нөпір ағынға,
Бекерге қарап отырамын ба?
Көктеммен бірге бүрлейін мен де,
Қазақтың мынау топырағында…
Оқушы Ильяс Мирғиясов мәнерлеп оқыған бұл ойлы өлеңнің авторы – Қазақстан Жазушылар одағының мүшесі, Алматы қаласы жастар саясатын дамыту мемлекеттік қоры аясындағы «Әдебиет әлемі» орталығының жетекшісі, ақын Мұратқан Шоқан.
Әдеби кеште Нұртас Тұрғанбек, Құрбангүл Ағабек, Рақымберді Жетібай, Сабира Анварова, т.б. ондаған жас ақындар, әдеби топтардың жетекшілері, саясаткерлер мектеп оқушыларының поэзия туралы, достық хақында қойған сұрақтарына жауап беріп, бірлік, ынтымақ, мейірім жайында жазылған өлеңдерін оқыды.
Мұнан соң ежелден етене жақын екі халықтың құрметіне гимназияда «Поэзия достығы» сайты ашылды. Оның лентасын жазушылар Ахметжан Ашири мен Қали Сәрсенбай қиды.
Кештің екінші бөлімінде қос гимназия оқушылары «Қазақстан – ортақ үйіміз» деген тақырыппен қонақтарға арнап концерт қойып берді. «Көк тудың желбірегені» әні, «Яңра» биі, «Қозы Көрпеш – Баян сұлу» мен «Ғерип-Сәнәм» қойылымдарынан көрініс, Абай мен Билал Назим бейнесі, тағы сол сияқты орындаулар қонақтардың көңілінен шықты.
Біртұтас еліміздің бәсекеге қабілетті мәдени менталитетін қалыптастыруға, заманауи мәдениет кластрлерін дамытуға бағытталған шара ретінде поэзия кешінің басты мақсаты: Ынтымағы мен бірлігі жарасқан қазақ және ұйғыр халықы арасындағы жас ақындардың шығармашылығын жалғап тұратын достық көпірін қалыптастыру. Дәстүрге айналдырып, жас ақындар кеші мен «дөңгелек үстелде» сырлы сұхбат жүргізіп, ақындар арасын поэзия арқылы бір-бірімен жақындастыру. Ұлттар арасындағы достық үлгісін көрсету. Міне, Мемлекет басшысының «Болашаққа бағдар: рухани жаңғыру» мақаласының бір жылдығын қорытындылаған Абдулла Розыбақиев атындағы №153 мектеп-гимназиясында өткен басқосу алдына қойған осы мақсаттарға жетті ғой деп ойлаймыз. Өлеңмен өрілген, түйдек-түйдек ойлар ортаға салынған әдеби кеш ұлт руханиятын ғасырлар биігіне көтеретін ұлы күштің бір қырын танытқанына шүбә жоқ.
Кеште туғанына 120 жыл толған ұйғыр ұлтының өкілі, елім деп от кешкен революционер, мемлекет және қоғам қайраткері, жалынды публицист Абдулла Розыбақиевтің кітабы қонақтарға тарту етілді.
Сәрсенбек БЕКМҰРАТҰЛЫ