«Азаттықтың ата заңы» мерекелік шарасы өтті
Жақында Алматы қаласы Медеу ауданында Ата Заң мерекесіне арналған арнайы жиын өтті. Конституция күні – біздің мемлекетіміздің, халқымыздың ең ұлық мерекелерінің бірі.
Конституция мызғымас мемлекеттігіміздің алтын қазығы, бірлігі мен ынтымағы жарасқан елдігіміздің бұлжымас бағдары, кемел келешегіміздің кепілі! Әрбір азаматы өзін тең сезінетін, татулығы жарасқан қазақ елінің, Қазақстан халқының қарымды істері бүгінде әлем жұртшылығы үшін үлгі-өнегеге айналды. Мұның өзі біздің Ата Заңымызда бүкіл адамзаттық құндылықтар мен өркениеттік игіліктердің барлығы қамтылғанын айғақтайды. Ал Ата Заңды ардақтау – келешекке керуен тартқан мемлекетіміздегі әрбір азаматтың асыл парызы.
Медеу ауданы әкімінің аппараты мен Оқушылар сарайының ұйымдастыруымен Оқушылар сарайында Қазақстан Республикасының Конституция күніне арналған «Азаттықтың ата заңы» атты мерекелік шара өте кең көлемде болып өтті. Аталмыш іс-шараны ұйымдастыруға, өтуіне аудандағы этномәдени бірлестіктер де үлес қосты.
Іс-шараға Медеу ауданының әкімі Е.Жылқыбаев, Қазақстан Республикасының еңбек сіңірген мәдениет және өнер қайраткерлері мен аудан тұрғындары қатысты. Ата заңымыздың осы жылдар ішіндегі жетістігі сөз болды.
Іс-шара соңы ҚР эстрада жұлдыздарының қатысуымен концерттік бағдарламаға ұласты.
Еркенұр Ерзия