Нарық

Танымал тэгтер: , , , , ,

Шенеунік үш жылға қамалды

0 289

«ҚР Ауылшаруашылық министрлігіне қарасты агроөндірістік кешеніндегі мемлекеттік инспекция Комитетінің Алтынсарин аудандық аймақаралық инспекциясы» мемлекеттік мекемесінің бастығы Мэлс Шаймағанбетов ҚР ҚК 311-бабы 2-бөлімі (пара алу) бойынша толығымен айыпты саналып, үш жылға бас бостандығынан айырылды. Сот шешіміне сәйкес, бұрынғы шенеуніктің меншігіндегі мүлкі де тәркіленіп алынатын болды. Енді пара алған лауазымды тұлға жазасын жалпы режимдегі колонияда өтейтін болды.

Іс материалдарына сәйкес, Шаймағанбетов Алтынсарин ауданында бруцеллез ауруына шалдыққан малды сатып алумен айналысқан кәсіпкерге ұсыныс жасаған. Белгілі болғандай, шенеунік кәсіпкерден ақша талап етіп, оның есесіне, аудан бойынша оның жұмысына ешкім кедергі болмайтынына уәде еткен. Кәсіпкер болса, шенеунік сұраған әрбір малдың басына 5 мың теңгені 3 мың теңгеге дейін түсіруге келісіпті.

Наурыз айында Шаймағанбетов кәсіпкерден 54 мың теңге пара алу барысында Қаржы полициясының қолына түсті. Бұл сома 18 ірі қара мал үшін берілген болып отыр.

Бруцеллез дегеніміз – адам және жануарларда бактериялардың кесірінен пайда болатын өткір дерт. Бруцеллалар жоғарғы температураға шыдамсыз. Сұйық ортада шамамен 60 градуста бруцеллалар 30 минуттың ішінде өлетін болса, Цельсий бойынша 80-85 градуста 5 минуттың ішінде өледі.

Автор: Ерғали НӘБИҰЛЫ