Әлемде отар мемлекеттер әлі де бар ма?
Менің білгім келетіні, осы қазіргі кезде отар мемлекеттер бар ма екен?
Қалжан, Оңтүстік Қазақстан облысы
Жалпы, қазіргі кезде отар мемлекеттер жоқ деп айтылғанымен, отарлық қамытта отырған елдердің саны туралы бір ауыз сөзбен айту мүмкін емес. Отар мемлекеттің белгісі – саяси еркіндігінің, құқықтық мәртебесінің болмауы, экономикалық кіріптарлық пен этникалық дербестіктен, мәдени-әлеуметтік дамуының басқа ел тарапынан күшпен тежелуі. Отар елдер метрополия, протекторат, вассалитет, концессия, марионеттік режим түрінде әртүрлі дәрежеде басқаларға тәуелділікте болады. Қазіргі тәуелді территориялар қатарына Францияның «теңіздік департаменттері» және «теңіздік қауымдастықтары», Британия корольдігі «тәжі астындағы жерлер», АҚШ-тың «инкорпорацияланбаған территориялары» жатады. Мәселен, француз Гвианасы немесе Пуэрто-Рико. Шотланд ұлтшылдары Шотландияны Британияға отар деп есептейді, бретондықтар Бретаниді Францияның отары дейді. Қазіргі кезде «отар» деген сөз қолданыстан шығарылып, тәуелді жерлерді мемлекетке ассоциациялау деген атаумен басқару кең тараған. Сонымен, отар елдер: Солтүстік Ирландия, Норманд аралдары, Мэн аралы, Гибралтар, Бермуд, Гренландия, Мадейра, Балеар, Канар аралдары, Гваделупа, Гуантанамо, америкалық Самоа, Кук аралы және басқалар.
