Газет ашу үшін не істеу керек?
Мен өз күшіммен жекеменшік газет ашып, оны Мәдениет және спорт министрлігінде тіркетіп, басылымды апта сайын шығарып тұрсам деймін. Ол үшін не істеуім керек? Оған қандай құжаттар талап етіледі?
Берік, Шымкент қаласы
Мерзімді басылымды есепке қою үшін жекеменшік иесі Қазақстан Республикасының «Бұқаралық ақпарат құралдары туралы» Заңының 11- бабына сәйкес уәкілетті органға (Мәдениет және спорт министрлігіне) өтініш беру қажет. Аталмыш өтінішке: жеке тұлғалар үшiн - кәсiпкерлiк қызметпен айналысу құқығын растайтын құжаттың нотариалды түрде куәландырылған көшірмесі; заңды тұлғалар үшін - заңды тұлғаны мемлекеттік тіркеу (қайта тіркеу) туралы куәліктің, құрылтай құжаттарының нотариалды түрде куәландырылған көшірмелері; - бюджетке алым төленгенін растайтын құжат қоса тіркеледі. Өтініш пен қоса берілетін құжаттар уәкілетті органға келіп түскеннен күннен бастап он бес күн аралығында қаралуға тиіс. Ал баспасөз басылымының жарыққа шығу жиілігі өтініште көрсетілуі бойынша анықталады. Сондай-ақ жоғарыда аталған Заңның 12-бабына сәйкес, басылымның таралымы жүз данадан кем болмауы тиіс.
