Жерлеуге байланысты жәрдемақы берілуі тиіс пе?
Осы жылы наурыз айында әкеміз қайтыс болған еді. Мемлекеттік зейнетақы төлеу орталығынан жерлеуге байланысты берілетін жәрдемақыға өтініш берсек, «әкелерің соңғы жылда жұмыс істемеген, сол себепті қорға ақша аударылмаған. Сондықтан жәрдемақы берілмейді» дейді. Осы дұрыс па?
Зинетбек, Алматы облысы
Сарапшы маманның мәліметінше, «Қазақстан Республикасында зейнетақымен қамсыздандыру туралы» 1997 жылдың 20 маусымындағы №136 Қазақстан Республикасы заңының 8-бабына сәйкес, Мемлекеттік зейнетақы төлеу орталығынан зейнетақы алушы азамат қайтыс болған жағдайда отбасына жерлеу рәсімін өткізуге 15 айлық есептік көрсеткіш (АЕК) мөлшерінде бір реттік жәрдемақы беріледі. Егер қайтыс болған азамат Ұлы Отан соғысының ардагері болса, оның отбасына, отбасы болмаған жағдайда жерлеу рәсімін өткізетін сенімді жеке тұлғаға немесе заңды тұлғаға 35 АЕК мөлшерінде бір реттік жәрдемақы беріледі.
Сондай-ақ, аталмыш заңның 25-бабына сәйкес, егер қайтыс болған азамат зейнет жасына жетпеген болса және зейнетақы жинақтау қорында жинағы болса, онда осы заңның 9-бабының 1-3 тармақтарына сәйкес, жерлеу рәсімін өткізуге байланысты оның отбасына 50 АЕК мөлшерінде, бірақ қордағы жинақ көлемінен аспайтын мөлшерде бір реттік жәрдемақы төленеді.
