Еліміздің төтенше жағдайлар саласының өкілдері жыл он екі ай халықтың қауіпсіздігі үшін алаңдаулы. Өйткені жылдың қай мезгілінде болмасын, тұрғындарға төнер қауіп көп. Жаз келсе төтеншеліктер тұрғындарға аттракционды қолданудың да өзіндік ережесі бар екенін ескертеді, ата-аналармен арнайы түсіндіру жұмыстарын жүргізіп, қауіптің алдын алу мақсатында жұмыстар жасайды. Өйткені жазда жаппай қолданысқа енетін аттракциондардан да айтарлықтай қауіп бар көрінеді. Осы орайда жаз келсе барлық баланың жазғы ойын алаңдарына асығатынын ескере отырып, дәл қазіргі кезеңде төтенше жағдайлар саласының мамандары республика бойынша аттракциондар мен батуттардан келетін қауіптің алдын алу мақсатында арнайы рейдтік шаралар жүргізуде.

Статистикаға сенсек, жазғы ойын алаңдарындағы құралдардан жыл сайын қаншама бала жарақат алып, қаза болып жататын көрінеді. Сондықтан аттракциондар мен ойын-сауық жабдықтарын пайдалануда қауіпсіздік ережелерін басшылыққа ала отырып, пайдалану қажет екен. Осы орайда төтеншелік мамандар 2014 жылға дейін Еуразиялық экономикалық одақ елдерінде, соның ішінде Қазақстанда тиісті нормативті - құқықтық актілердің болмауынан балалардың өмірі мен денсаулығына қауіп төніп, жарақат санының көбеюіне, сонымен қатар аттракцион иелерінің қызметіне жауапсыз қарауына алаңдаулы болып келді. Еуразиялық экономикалық одақ аумағында аттракциондардың қолдануы мен пайдалануына және олардың әзірленіп жобалау, дайындау, монтаждау және орнату (монтаждау), монтаждау, пайдалану (қолдану), сақтау, тасымалдау және кәдеге жаратуына байланысты бірдей талаптар қою үшін, сондай-ақ Еуразиялық экономикалық одақ аумағында айналымға шығарылатын аттракциондардың еркін қозғалысын қамтамасыз ету үшін 2014 жылдың 29 мамырында Еуразиялық экономикалық одақ туралы Шарттың 52-бабына сәйкес, Еуразиялық экономикалық одақтың «Аттракциондар қауіпсіздігі туралы» техникалық регламенті әзірленген. Алайда аталмыш құжаттағы техникалық регламент аттракциондар қауіпсіздігіне ең төменгі талаптарды белгілеуінен аяқ асты орын алатын төтенше жағдай кезінде бұл айтарлықтай қиындық тудырып отыр. Сондықтан бүгінгі күні төтеншелік мамандар арнайы техникалық регламенттің күшіне енуіне мүдделі. Себебі бұл аттракциондар қауіпсіздігінің талаптарының күшеюіне, ал ол сөзсіз жарақаттардың азаюына әкеледі дейді.

Төтеншелік мамандар бүгінгі күні өз тараптарынан қауіптің алдын алу үшін батут иелерімен аттракциондарда қауіпсіздікті сақтау және қамтамасыз ету туралы әңгіме жүргізіп, қауіпсіздіктің сақталуы үшін жұмыс істеуде. Ата-аналарға да мұндай жерлерде балаларды қараусыз қалдыруға болмайтынын ескертіп, батут иелерінен батуттарды дұрыс орнатуға және олардың сенімді нығаюына ерекше назар аударуды талап етіп отыр. Аттракционды құрастыру (құрастыру және орнату), баптау және реттеу (дайындаушының ұсынымдарына сәйкес), техникалық куәландыру, аттракционды есепке қою, аттракционды пайдалануға беру және аттракционды пайдалану сияқты аттракциондарды қауіпсіз пайдалануды қамтамасыз ету кезеңдері бойынша «Аттракциондардың қауіпсіздігі. Аттракциондарды пайдалануға беру және оларды пайдалану кезіндегі қауіпсіздік талаптары» ұлттық стандарты талаптарына сәйкес ұсыныстар жасап, талап етуде. Балаларымыздың көкейінде ойын алаңдары қауіпті мекен ретінде сақталып қалмасы үшін дәл қазіргі таңда республика бойынша жүргізіліп жатқан рейдтердің маңызы зор!

Қуаныш Ерсұңқар