Құрметті оқырмандар назарына! «Алаш айнасы» желілік-басылымы Ақпарат комитетінің 2023 жылғы 01 қарашадағы № 15 бұйрығы негізінде 2023 жылғы 30 қазаннан бастап бұқаралық ақпарат құралы ретінде өз қызметін тоқтатты.

К сведению уважаемых читателей! Сетевое издание «Алаш айнасы» на основании Приказа Комитета информации № 15 от «01» ноября 2023 года прекратил свою деятельность в качестве средства массовой информации с 30 октября 2023 года.

"Ақшаға жасап береміз": Қостанайда қылмыстық топ жүргізуші куәлігін алушыларды емтихансыз өткізіп отырған

12 сәуір 2023, 21:28

Қостанай облысының полициясы жүргізуші куәлігін алуға емтихан қабылдаумен айналысатын қылмыстық топты әшкереледі, деп хабарлайды Stan.kz ақпарат агенттігі.

Жүргізуші куәлігін алушылардан емтихан қабылдау қызметін тендерден жеңіп алған ЖШС өкілдері куәлікті емтихан нәтижесіне емес "сыйақыға" беріп отырған. Ол үшін арнайы жоспар құрылған. Жоспар бойынша куәлік алушылар емтиханға мүлдем келмейтін болған.

Қылмыстық топ мүшелерін ұстауға облыстың жолдарындағы апатты жағдайларға жүргізілген талдау жұмыстарының нәтижесі негіз болған.

Мәселен, жыл басында Рудный қаласында Chevrolet Cobalt автокөлігінің 9 жастағы жүргізушісі Audi автокөлігімен соқтығысты. Тексеру кезінде жүргізушінің тәжірибесі 1 айдан да аспайтын болып шықты. Салдарынан Audi жолаушысы ауыр дене жарақатын алды. Ықтимал сыбайлас жемқорлық схемасын анықтау бойынша арнайы операция жүргізу туралы шешім қабылданды.

“12 сәуір күні Қостанайда осы қылмыстық әрекетке қатысты күдікті бес адам ұсталды. Емтихан алушылар ақылы түрде жүргізуші куәлігін беріп отырған, тест тапсырушы болса, емтиханды 40 минутта емес, 5 минутта тапсыратын болған. Көбісі мемлекеттік тілді білмесе де, тестті сол тілде тапсырған. Қазіргі уақытта қажетті алғашқы тергеу әрекеттері, соның ішінде дәлелдерді бекітуге бағытталған санкцияланған іздеулер жүргізіліп жатыр. Банк карталары, 1 млн теңгеден астам қолма-қол ақша, компьютерлік техника, флеш-карталар, телефондар мен құжаттар тәркіленді. Сондай-ақ тінту барысында күдіктілердің бірінен 12 калибрлі патрондар мен тіркелмеген тегіс ұңғылы мылтық тәркіленді”, – деді Қостанай облысы ПД бастығы Ерлан Омарбеков.

Арнайы операция облыстық прокуратураның қадағалауымен жүргізілді. Іс-шара барысында осылайша мыңнан астам адам емтихан тапсырғаны анықталды. Полиция қылмыстық топтың барлық мүшелеріне қатысты сотқа дейінгі тергеуді бастады.