Алматы облысында белгіленбеген жерден жолды кесіп өтпек болған жаяу жүргінші мерт болды, деп хабарлайды Azattyq Rýhy.
Қайғылы оқиға 2022 жылдың 14 қарашасында сағат 7:20 шамасында орын алды, деп хабарлады Алматы облысы ПД баспасөз қызметі.
48 жастағы Skoda автокөлігінің жүргізушісі солтүстік бағытта "Алматы-Өскемен" тас жолымен құйғытып келе жатып, белгіленбеген жерден жолды кесіп өтіп бара жатқан жаяу жүргіншіні қаққан, делінген хабарламада.
Жол-көлік оқиғасы салдарынан 63 жастағы жаяу жүргінші оқиға орнында мерт болды.
Аталған факт ҚР Қылмыстық кодексінің 345-бабы 3-бөлігінде қарастырылған қылмыстық құқық бұзушылық белгілері бойынша Іле ауданының ЕҚДБ-да тіркелді.
Қазіргі уақытта тергеу амалдары жүргізіліп жатыр, қажетті сараптамалар тағайындалды.