БҚО-да қорықшы өліміне қатысы бар деген күдікті ұсталды

15 желтоқсан 2021, 22:05

Батыс Қазақстан облысында орман шаруашылығы және жануарлар дүниесі аумақтық инспекциясының бөлім басшысы Серік Мәженовтың өліміне қатысы бар деген күдікті ұсталды. Бұл туралы облыстық полиция департаментінің баспасөз қызметі хабарлады.

 
Департаменттің мәліметінше, екінші тұлға куәгер ретінде алынды.

"Күдікті біреу. Тергеу әрқайсының рөлін анықтайтын болады. Cот алдындағы тергеу аясында тексерулер жүріп жатыр", - деп хабарлады облыстық полиция департаментінің баспасөз қызметі.
Әзірге полиция оқ ату аңшылық кезінде болған деген нұсқаны ұстанып отыр. Ал инспекциядағылар Серік Мәженовтың аңшылық жасады дегеніне сенбейді.

"Оның аңшылық жасады дегені қисынсыз. Ол броконьерлердің жолын кеспек болған деген ойдамыз. Оның жанында қызметтік қаруы болған", - дейді облыстық орман шаруашылығы және жануарлар дүниесі аумақтық инспекциясының басшысы Қайрат Кадешев.
Бұған дейін Батыс Қазақстан облысында орман шаруашылығы және жануарлар дүниесі аумақтық инспекциясының бөлім басшысы Серік Мәженовтің қайтыс болғаны туралы жазған болатынбыз.