Еліміздің теңіз порттары жылына 23,7 млн тонна жүк өткізе алады – ҚР ИИДМ

11 наурыз 2022, 14:45

Қазіргі уақытта еліміздің теңіз порттарына 18 млн тоннаға дейін жүкті қайта бағдарлауға болады

Украинаның айналасындағы жағдайға және соған байланысты туындаған логистикалық қиындықтарға байланысты қазақстандық экспорттаушыларға жүктерін еліміздің теңіз порттары арқылы және одан әрі Транскаспий халықаралық көлік бағытымен жөнелту мүмкіндігін пайдалану ұсынылды. Бұл туралы Azattyq Rýhy Индустрия және инфрақұрылымдық даму министрлігіне сілтеме жасап хабарлайды.

 
Жүргізілген келіссөздердің қорытындысында «Арселор Миттал Теміртау» АҚ 50 мың тоннаға жуық металл өнімін Ақтау портына қайта бағдарлап, әрі қарай Әзербайжан мен Грузия арқылы жөнелтуге дайын екенін білдірді.

Қазақстан теңіз порттарының жалпы өткізу қабілеті жылына 23,7 млн тоннаны құрайды. Атап айтқанда:

Ақтау порты – 14,7 млн тонна (мұнай – 9,5 млн, құрғақ жүктер - 2,5 млн, астық – 0,7 млн, паромдық жүктер - 2 млн тонна);
Құрық порты - 6 млн тонна (теміржол терминалы - 4 млн, автотерминал – 2 млн);
Ақтау солтүстік теңіз терминалы - 3 млн тонна (құрғақ жүктер мен астық 1,5 млн тоннадан) жүк өткізе алады.
Сонымен қатар, қазіргі уақытта еліміздің теңіз порттарына 18 млн тоннаға дейін жүкті қайта бағдарлауға болады.

Қазақстан порттарында, сондай-ақ, бір уақытта жүктердің белгілі бір көлемін сақтауға болады. Оның ішінде:

Ақтау порты - 2,5 мың контейнер, 25 мың тонна астық, 220 мың бас жүк;
Құрық порты - 250 жүк көлігін;
Ақтау солтүстік теңіз терминалы - 6 мың контейнер, 60 мың тонна астық, 170 мың тонна басты жүкті (орамада тасымалданатын жеке жүктер мен тауарлар) сақтай алады.