Елорда мектептеріне жаппай бейнебақылау орнату қандай қажеттіліктен туындады

23 қазан 2020, 12:28

Нұр-Сұлтан қаласының әрбір мектебіне 24 камера орнатылды. Цифрландыру бағыты бойынша, елорда мектептерінің барлығы бейнебақылау камераларымен қамтылды. Бұл туралы Azattyq Rýhy хабарлайды. 

«Барлық білім беру ұйымдары сандық бейнебақылаумен 100% қамтамасыз етілген. Сонымен қатар Нұр-Сұлтан қаласы мәслихатының 2020 жылғы 31 наурыздағы «Нұр-Сұлтан қаласы мәслихатының 2019 жылғы 12 желтоқсандағы шешіміне өзгерістер мен толықтырулар енгізу туралы» № 480/62-VI шешімімен білім беру ұйымдарын бейнебақылаумен қамтамасыз ету үшін 609,5 млн теңге сомасында қаражат бөлінді»,- деді Нұр-Сұлтан қаласы Білім басқармасының экономика және жоспарлау бөлімінің басшысы Айжан Баймолдина.
Айта кетерлігі, 2020-2021 оқу жылының басында қосымша тағы да 4 752 камера орнатылды. Яғни, әр білім беру объектісінде 24 камерадан бар.

Бейнебақылауды мектептің әкімшілігі, күзет қызметкерлері қадағалайды. Жедел әрекет ету үшін барлық камералардан қалалық бірыңғай ахуалдық орталығына  ақпарат жеткізіледі.  

Бұл жаңашылдық ел президенті Қасым-Жомарт Тоқаевтың балалардың мектептегі қауіпсіздігін күшейту туралы тапсырмасынан кейін жүзеге асырылды. 

Еске сала кетейік, бұған дейін Azattyq Rýhy енді ата-аналардың мектептегі асханаларда балаларының қалай тамақтанып жатқанын бақылай алатыны жөнінде хабарлаған.