Отандық «Мұқағали» фильмі әлемдік кинофестивальде бес бірдей жүлдені еншіледі

14 желтоқсан 2022, 22:18

Белгілі кинорежиссер Болат Қалымбетовтың «Мұқағали» көркем фильмі Шотландияда өткен халықаралық Сент-Эндрюс кинофестивалінде бес жүлдені жеңіп алды. Бұл туралы  Ш. Айманов атындағы «Қазақфильм» киностудиясының баспасөз қызметі мәлім етті, деп хабарлайды Azattyq Rýhy.

 
Киностудияның мәліметінше, Сент-Эндрюс кинофестивалінде «Мұқағали» көркем фильмі бірден бес жүлдеге ие болды. Атап айтар болсақ, гран-при, үздік кинодраматург, үздік кинорежиссер, үздік оператор және үздік актер аталымдарына лайық танылды.

«Мұқағали» көркем фильмі бір жылда 10 халықаралық сыйлыққа ие болды. Бұл – бұрын-соңды болмаған өте қуанышты жаңалық. Барша қазақ киносын қадірлейтін көрермендерге алғысымды білдіремін. Қазақтың ұлы ақынын ұлықтаған фильм жастарға тек шабыт берсін, Мұқағали атамыздың өнерін дарытсын деп тілегім келеді. Тәуелсіздік күні қарсаңында әлемнің белді сыншылары өз бағасын берген бұл жүлделер – қазақ халқының ортақ жеңісі», - деді фильмнің режиссері Болат Қалымбетов.