Серік Күдебаевтың соты тағы кейінге қалды

16 наурыз 2023, 13:33

Бүгін генерал-майор Күдебаевқа қатысты үкім шығарылуы керек еді.

Алматы облыстық полиция департаментінің бұрынғы басшысы Серік Күдебаевқа қатысты сот отырысы тағы кейінге қалды, деп хабарлайды Sn.kz ақпарат агенттігі. 

Бүгін генерал-майор Күдебаевқа қатысты үкім шығарылуы керек еді. Алайда оның сырқатына байланысты сот отырысы кейінге шегерілді.

Талдықорған қалалық сотының баспасөз қызметі мәлім еткендей, келесі отырыстың өтетін күні кейінірек белгілі болады.

Бұған дейін Серік Күдебаевтың ауруханаға түскені белгілі болған. Ал прокурор судьядан Серік Күдебаевқа 9 жыл бас бостандығынан айыру жазасын тағайындауды сұраған болатын. Күдебаевтың соты қаңтар айында басталған.

Еске салсақ, Алматы облыстық полиция департаментінің бұрынғы басшысы Серік Күдебаев қаңтар оқиғасы бойынша күдікті деп танылған еді. Қадағалау департаментінде анықталғандай, Алматы облысының ПД бұрынғы басшысы "ауыр зардаптарға әкеп соқтырған қызметтегі әрекетсіздік" деген күдікке ілінді.

Ол 2020 жылдан бастап 2022 жылдың қаңтарына дейін Алматы облысы полиция департаментінің бастығы қызметін атқарған.

2022 жылдың 18 ақпанында ол ішкі істер органдарынан өз еркімен босатылды.