Aehra («Эра») стартапының туындысы сырттай ешкімді таңғалдырмайды. Купе пішінді орта көлемді кроссовердің алдыңғы есігі құс қанатын еске салады, ал артқы бөлігіне көз салса, машина көрмеге шығатын концепт секілді, - деп хабарлайды Alashainasy.kz тілшісі Кolesa.kz-ке сілтеме жасап.
Дегенмен ішіндегі бір элементке назар аудармау мүмкін емес, оны тіпті алпауыт өндірушілер байқап, болашақта жаппай қолданатын сияқты.
Біз сөз етіп отырған құрылғы — торпедо артынан шығатын аса ірі экран. Ол жаңа шыққан голливуд блокбастерін көріп, ойын ойнауға және онлайн-митап өткізуге мүмкіндік беретін нағыз кинотеатр.
Алдыңғы әйнекті толық жауып тұратын экранды қосып алып, көлік жүргізе алмайтыныңыз анық. Сондықтан ол машинаны тұраққа қойғанда ғана көтеріледі, ал жол үстінде аспаптар панелі мен навигатор қызметін атқаратын үштен бір бөлігі ғана көрінеді. Айта кетерлігі, ортаңғы консольдегі тачскрин мен артқы камера жазбаларын көрсететін монитор орнын сақтап қалған, алайда үлкен әрі су жаңа құрылғының қасында күңгірт тартып көзге түсе қоймайды.
Aehra Motor1.com басылымына жобаны іске асыруға қаражат бөлінгенін және тапшы компоненттерді жеткізетін компаниялар бекітілген соң жұмыс жүретінін хабарлапты. Болжам бойынша өндіріс келер жылдың екінші тоқсанында басталады.