Елбасы Алаш арыстарының арманын жүзеге асырды
Кеңестік рух қазанда оянса, қазақы рух желтоқсанда жарып шығады-ау деп қаласыз кейде. Бұл ой өздігінен туа салмайды, яғни оған түрткі болар жайт бар, әрине, кәрі тарихта. 1986 жылғы Желтоқсанды айтсақ та жеткілікті. Алайда ең басты бір дата бар, ол – Тәуелсіздігіміздің мейрамы – 16 желтоқсан.
Және күні кеше біріміз ескерсек, біріміз елемей өткізіп алдық, желтоқсанның 12-сі – Алашорданың құрылған күні. Міне, керемет сәйкестік: қазақ сонау бір кездерде де «Ұранымыз – Алаш, керегеміз – ағаш!» деп алғаш өз алдына автономия құрған кезі де, кейін 1991 жылы ресми түрде тәуелсіз республика атануы да осы желтоқсан айына тура келеді екен.
Тәуелсіздіктің мән-мағынасын терең түсініп, толыққанды тарихымызды зерделейміз десек, онда Алаш тақырыбын аттап не айналып өте алмасымыз айдан анық. Себебі қазақтың өзгеге кіріптар ұлт болмауын, қазақтың өз жері мен жерасты қазба байлығының өз мүддесіне жұмсалуына алғаш ашып айтып, сол жолда күрескен үркердей топ болса, ол – осы алашшыл ата-бабамыз. Бірақ сол жарқын мүдденің ащысы, азабы, адам айтса сенгісіз қасіретін тартқан олар, яғни Әлихан Бөкейханов бастаған қазақтың текті ерлері де шын мәнінде Тәуелсіздікті өз көзімізбен көріп, егемен елдің көк байрағының астында өмір сүріп жатқан мына бүгінгі ұрпақ. Тұңғыш Елбасымыз сол Алаш арыстары армандап кеткен ұлы мұратты қазағына алып берді.
Айгүл ІСМАҚОВА, филология ғылымының докторы, профессор:
– 1988 жылы қайта оралған Алашорда мемлекет қайраткерлері, «Алаш» партиясының көшбасшылары, Алаш ғылымының басында тұрған қазақтың тұңғыш саяси элитасының мұрасы мен «Отанды сүю – иманнан» тұрғысынан іске асқан текті істерін мақтаныш ететін тәуелсіз кездің жас ұрпағы қалыптасты. Алаш ардақтылары туралы рухани әңгімелер бүгінгі қазақтың қазіргі жастарының жанына қажет. Себебі бұл рухани сабақтардың басты ойы – Отанды сүю, елге қызмет ету, Отан үшін отқа түсу. Мұндай мысалдар Отан емес, тек ақшаға табынып бара жатқан қазіргі қазақтарға ерекше қажет екені айқын.
Қазақ егемен ел болғанда да, Тәуелсіздік концепциясын ойдан шығарып, жоқтан бар құраған жоқ. Яғни сонау бір кездердегі Жәнібек пен Керей құрған хандық пен берісі Алаш автономиясы салған сүрлеу, ту еткен идеяны жалғастырды. Ал Алаш көшбасшылары болса сол тұста қазақтың бойындағы қайсарлық рухты түртіп ояту үшін ешқандай езгіге жаншылмай, өз ұлттық ерекшелігін сақтап қалған елді іздеді. ХІХ ғасырдың соңы мен ХХ ғасырдың басында Еуразия кеңістігінде батыстың экспансиясына ұшырамаған бірден-бір ел Жапония еді. М.Әуезов күншығыс елінің 1861 жылы жүзеге асырған әйгілі «Мэйдзи» реформасын талдай келе, соның ішіндегі білімге қатысты тұсына баса назар аударады. Алашорда үкіметін құрып, аяқтан тік тұрғызуға бізге сондай тәжірибе қажет еді.
Алаштанушы ғалым Тұрсын Жұртбай да өзінің осы тақырыптағы мақалаларында ұлттық бірлік пен Тәуелсіздік жолында құрылған «Алаш» партиясының негізгі бес ұстанымын талдай келе, «Бесінші – ең негізгі ұстанымы бойынша ғылымға, соның ішінде тәуелсіз ғылымға, ұлттық дәстүрге негізделген, заңға сүйене отырып, Жапония үлгісіндегі ұлттық-демократиялық мемлекет құрылуы керек еді. Алаш қайраткерлерінің бұл ұстанымының дұрыстығына самурайлық дәстүрге негізделген жапон ұлтының бар-жоғы 20 жылдың ішінде біртұтас империяға айналып шыға келуі дәлел болса керек. Дәстүрге беріктік деп отырғаны осы», – дейді.
Рас, мінекей, біз де 20 жылдан жаңа асқан Тәуелсіздік тарихымызда Астана секілді жаңа елорда салып, әрине, қала салу үшін қазақтың экономикалық және әлеуметтік жағдайын түзеп, әлемге танытып та үлгердік, шүкір.
«...Тумақ болса, өлмек бар... Өлгенді еске түсіргенде біз олардың тірісінде істеген ісін ескереміз. Соның ісіндей іс істеп, соның өміріндей өмір сүруді іздейміз. Сондықтан өлгенді еске түсіргенде оның істерін ескеру – біздің ең бірінші міндетіміз». Бұл сөзді Алаштың арыстандай айбатты ұлдарының бірі Смағұл Сәдуақасов айтқан болатын. Осынау сөзді оқыған сайын Смағұлдай сұңғыла азамат өздерінің ұлт үшін құрбан боларын сезгендей, соны өзінен кейінгі ұрпаққа ескертіп кеткендей көрінеді маған. Кеңестік империя алғаш таққа отырған тұста Сталин өзін жаһан жаулаушысы Шыңғыс ханнан кем көрмеді десек те болады, қолына қан шеңгелдеп, ысқырына іске кіріскен Йосифтің бетіне қарсы келу деген байлаулы тұрған дар ағашына өз еркіңмен барып, мойныңа қыл арқан салумен бірдей еді десем артық айтпаспын, сірә. Алайда Смағұл Сәдуақасов, Сұлтанбек Қожанов, Әлихан Бөкейханов сынды арғы тегі Ашина, Көк бөріден тарайтын қазақтың қасқыр жүрек ұлдарының Кремль әміршісінің алдына именбей кіріп, тайсақтамай турасын айтқаны жайлы бүгінгіге аңыздай боп жеткен әңгімелер аз емес. Бұл шүбәсіз шындық, себебі арыстарымыз «Ленин айтты – заң», «Сталинге құлдық» десе, оларды «теңізден сүзген маржандай» теріп алып, итжеккенге айдап, атып, ұрпағын қырып әуре болмас еді. Құлды кім өзіне теңдес дұшпан көруші еді? Ал біздің арыстарымыз Алашы үшін арпалысып, кеудесінде соңғы күші қалғанша берілмеді. Құлдықтың қамытын киіп тірі жүргенше, ұяты мен ұлтының алдында қасқайған күйі бақиға аттануды бақыт санады.
Неге екені, қайталанбас тұлғалардың көбінің артында ұрпақ қалмайды. Бұл да болса өмірдің жазылмаған заңы ма болмаса Тәңірдің тылсым құдіреті ме екен?!. Тарихта бұған мысал боларлық тұлғалар көп. Алаш көсемі Әлихан Бөкейхановтың Үгітай (Сергей) атты ұлы болғанын білсек те, олардан ұрпақ қалмаған. Елизавета Әлиханқызы Смағұл Сәдуақасовқа тұрмысқа шықса да, олардан да ұрпақ қалмапты. Ахаң, Ахмет Байтұрсыновтай асыл азаматтың да, Мағжандай отты ақынның да, Сәкеннің де ошағының отын өшірмейтін бір перзенті қалмағаны өзекті өртерлік жайт. Алайда олар артында мәңгі өлмейтін мұра қалдырды, ол мұрамен сусындаған әрбір Алаш баласы, демек, мына біздер, сол Әлиханның, сол Ахаңның, Мағжан, Сәкен, Сұлтанмахмұттардың жалғасымыз. Біз бүгін тәуелсіз елде еркін өмір сүріп жатсақ, бұл бір кездегі Алаштың арманының орындалуы, солардың қыршыннан қиылған ғұмырлары мен көрмей кеткен қызықтарының өтеуі деп білгеніміз жөн. Сондықтан күнде айнаға қарағанда біз одан тек өз бейнемізді ғана көріп қоя салмауға тиіспіз, сол бақытты жүздің ар жағынан біздің асқақ кеудемізге күш-жігер беріп тұрған Алаш рухын көруге тиіспіз. Себебі біз әрқайсымыз – Алаш баласымыз! Мойнымызда Алаш аманаты, қолымызда Алаш туы бар. Біз сол тудың астында «Күн сөнгенше, сөнбейміз»!