Алматыда 1-сынып оқушысы зорланған мектепте бірқатар тәртіп бұзушылық анықталды

13 мамыр 2022, 16:54

Қазіргі уақытта тексеру жұмыстары жалғасып жатыр. Полиция Алматыдағы "Мариям" жеке мектебінің 1-сынып оқушысын зорлау дерегі бойынша қылмыстық іс қозғағаннан кейін білім және ғылым министрлігінің өкілдері мектепті тексерді.
 
"Кеше БҒМ балалардың құқықтарын қорғау комитетінің төрағасы Есенғазы Иманғалиев пен балалар құқықтары жөніндегі штаттан тыс кеңесші Раиса Шер "Мариям" жекеменшік ұйымында оқитын 1-сынып оқушысына қатысты мән-жайды зерделеу үшін Алматыға ұшты. Олар оқушының отбасына барды. Балаға психологиялық көмек көрсетіліп жатыр", - деп хабарлады білім және ғылым министрлігі.
 
Сондай-ақ комитет қызметкерлері Алматы қаласының құқық қорғау органдарының өкілдерімен кездесті.
"Мариям" жекеменшік ұйымының әкімшілігімен және ұстаздарымен әңгіме жүргізілді.
 
"Құрылған комиссияның тексеру нәтижесі бойынша оқу-тәрбие жұмысын ұйымдастыруда, балалардың қауіпсіздігін қамтамасыз етуде (бейнебақылауды қамтамасыз ету бойынша тиісті талаптарды сақтамау), қажетті санитарлық-гигиеналық талаптарды жасауда (сыныпта жарықтың нашарлығы, желдету жүйесінің болмауы және т.б.) бірқатар тәртіп бұзушылық анықталды", - деп атап өтті балалардың құқықтарын қорғау комитеті.
 
Қазіргі уақытта тексеру жұмыстары жалғасып жатыр. Оның қорытындысы бойынша шаралар қабылданады.