Назарбаев зияткерлік мектебіне енді ауыл квотасымен түсуге болады

19 желтоқсан 2022, 17:47

Дарынды балалардың Назарбаев зияткерлік мектептерінде білім алуына жағдай жасау үшін "Өркен" гранттар санынан 10% квота ауыл мектептерінде білім алатын үміткерлерге тағайындалады. Мұндай өзгеріс "Өркен" білім беру грантының қағидаларына енгізілмек, - деп хабарлайды Alashainasy.kz тілшісі Іnbusiness.kz-ке сілтеме жасап.

Бұл туралы Ашық НҚА порталында жарияланған құжат жобасында жазылған.

 

Оқу-ағарту министрлігінің түсіндіруінше, бұл өзгеріс Назарбаев зияткерлік мектептерінің 7-сыныптарында оқуға грант тағайындау бойынша ата-аналар қауымдастығынан түскен өтініштерді орындау мақсатында енгізілген.

 

Өзгертулер бойынша әр жылға бөлінетін грант санын жариялау мерзімі де енді нақты болады.

 

Жобаға сәйкес, тізім әр жылдың ақпан айынан кешіктірілмей жарияланады. 

 

Сондай-ақ, енді "Өркен" грантының емтиханын тапсырған үміткерлер мен олардың ата-аналары конкурс қорытындысын "Назарбаев Зияткерлік мектептері" ДББҰ ресми интернет-ресурсы арқылы білетін болады. Мұнда үміткердің жинаған балл саны және грант алғаны не алмағаны, болмаса резервке өткені туралы ақпарат жазылады.