Өркениет

Әншілер тілшімін деп сөз бермейді...

  • Алаш айнасы иллюстрациясы

    Алаш айнасы иллюстрациясы

Күні кеше елімізде тағы бір музыкалық телеарнаның қосылғанын жазып, өздеріңізден сүйінші сұрағанбыз. Жап-жаңа Gakku TV-ның іске қосылғанына қуаныштымыз, әрине. Бізді қуантқаны, жаңа арна тек отандық орындаушыларымыз бен әнші-сазгерлерімізді насихаттайтыны және арнаның тек шоу-бизнесті ғана емес, еліміздің мәдени өміріндегі жаңалықтарды қамтитыны. Алайда телеарна басшылығы мен продюсерлері эфирде жұмыс істейтін тележүргізушілер көрерменнің көңілінен шықпай қала ма деп әзірге оларды кадр сыртында қалдыруды ұйғарыпты. Соған қарағанда жүргізушілердің кәсібилігі күмән келтіреді-ау. Бұл музыкалық мәдени арна болғандықтан мұндағы бағдарламаларды да әнші-бишілер жүргізетін шығар деген ой келді бізге. Өйткені қазақ эстрадасының ханымы Роза апамыз бүгінде кәсіби журналист жоқ деп ренжіп жүрген жайы бар.

Таяуда Gakku TV жаңа телеарнасының іске қосылуына және 13 қыркүйекте Алматы қаласындағы «Астана» алаңында тұңғыш рет өткізілетін «Gakku дауысы» жаңа музыкалық фестиваліне арналған баспасөз мәслихатына қатысқан халық әртісі Роза Рымбаева көпшілікке өзінің назын білдірді.

– Әншілер тек концерттерде жүргізуші болып жұмыс жасай алады. Өйткені өзінің мамандығына қатысы бар. Ал жалпы журналистік жұмысты әншілердің атқарғанына дұрыс қарамаймын. Мүмкін бұл проблема дұрыс журналистердің жоқтығынан болар. Мен әлі күнге музыкалық тақырыпты кәсіби тұрғыда талқылай алатын журналистерді кездестірген жоқпын. Олардың көбінің қоятын сұрақтары тұрмыстық деңгейде. Оларды менің қандай киім киіп, қандай тамақ ішетінім, қандай көлік мінетінім ғана алаңдатады. Нағыз музыка тілінде сөйлесетін журналист жоқ, – дейді Роза Қуанышқызы.

Қазақ эстрадасында өзіндік орны бар әнші апамыздың бұл сөзіне біздің де айтар уәжіміз бар. Осы тұста Роза Рымбаева апаммен болған бір сұхбат есіме түсіп отырғаны...

Осыдан 2-3 жыл бұрын "Алаш айнасы" газетіндегі «Алашқа айтар датым бар» деген айдарға Роза Қуанышқызынан сұхбат алуға бардық. Өзімен алдын ала келісілген уақыт бойынша белгіленген орынға келгенімізде бірден қабағын қарс түйіп: «Біріншіден, фото тілшіңіз кете берсін, мен макияжсыз суретке түспеймін» деді. Содан кейін мен сұрақтарымды қойып бастамастан бұрын: «мен білетін қазақ журналистерінің бәрі топас, орыстың журналистерінен үйреніңдер. Сен менің концертіме де келіп көрген жоқ шығарсың. Мына газетіңнің бірінші бетіне суретімді шығару үшін, жарнама үшін керек болып тұрмын ба» деп дүрсе қоя бергенде не дерімді білмей қалғаным бар. Халық әртісінің алдында мәдениет сақтап сөз таластырмадым, ары қарай сұрақтарымды қоюға көштім. Қазақ эстрадасындағы, мәдениеттегі түйіткілдер туралы әңгіме қозғай бастағаным сол еді, «сен бұл әңгімелеріңді Мәдениет министрлігіне барып айт! Мен әншімін. Мен тек музыка туралы әңгімелесемін» деді. Музыка туралы да әңгімелестік. Сонда деймін-ау, осындай қазақ өнерінің көш басында жүрген аға-апаларымыз мәдени салаға қатысты салиқалы ой айта алмаса, оған журналистердің не кінәсі бар?

Ал енді о бастағы әңгімемізге оралайық. Телеарнада әншілер кәсіби тележүргізушілердің жоқтығынан әншілікпен жүргізушілікті жағаластырып жүр деу артық енді. Тек телеарна басшылары рейтинг үшін түр-түсі танымал әншілерді кез келген бағдарламаны жүргізуге шақыра беруді әдетке айналдырып алғаны болмаса...

Егер біз, журналистер қауымы «Қазақстанда іліп аларлық, жібі түзу әнші жоқ» деп көпке топырақ шашсақ, өзін өнерлімін деп санайтын азаматтарымыз қалай тулар еді? Ниеті дұрыс әншіге сөзі түзу журналист те табылады. Алдағы уақытта кәсіби тележүргізушілер әншілердің қолынан тізгінді өздері алатынына сеніміміз мол.

Қазіргі таңда журналистер үшін әншінің киім-кешегін, ішкен жегенін, мінген көлігін жазу қызық емес. Өйткені өнерпаздарымыздың өздері-ақ ешкім сұрамаса да әлеуметтік желіде отырып, қай дүкеннен не алғанын, қай мейрамханада кіммен қандай шәй ішкенін, қайда қыдырғанын, түнде ұйықтаған-ұйықтамағанын жазып, суретімен қоса жариялап отырады. Сондықтан су жаңа ашылған арна Hit.TV-ның көшірмесі болмайды деп, тек «Жұлдыздар жарқырайды» секілді жобалармен толмайды деп үміттенейік.

Автор: Айнұр Сенбаева




Көрілген: 1719    Пікірлер: 4

бейсенбі, 11.09.2014, 15:28

Достарыңмен бөліс:

2
  • СОҢҒЫ ЖАРИЯЛАНЫМДАР:

    Көп ашылған Көп пікір жазылған
    2019
    2008
    2009
    2010
    2011
    2012
    2013
    2014
    2015
    2016
    2017
    2018
    2019
    қыркүйек
    қаңтар
    ақпан
    наурыз
    сәуір
    мамыр
    маусым
    шілде
    тамыз
    қыркүйек
    қазан
    қараша
    желтоқсан

    Алаш Айнасы мұрағаты

    Дс Сс Ср Бс Жм Сн Жс
    1
    2 3 4 5 6 7 8
    9 10 11 12 13 14 15
    16 17 18 19 20 21 22
    23 24 25 26 27 28 29
    30