Бейбіт Сейдуалиева: Көзімше Тоқтардың ернінен сүйіп кеткен қыздар болды

11 қазан 2021, 17:28

Бейбіт Сейдуалиева жары Тоқтармен 20 жасында танысқан. Екеуі қыз-жігіт болып 7 жыл жүргенімен, мұны ұзақ уақыт бойы халықтан жасырған. Сол аралықта Тоқтарға да, Бейбітке де сезімін білдірген қыз-жігіттер көп болыпты. Бұл туралы Сейдуалиева "Жұлдыздың жары" бағдарламасында айтты, деп хабарлайды Stan.kz ақпарат агенттігі.

"Ол мені бірінші көрді. Байқауға қатысуға шақырды. Екеуміз сонда танысып, сөйлестік. Мен ән айттым. Тоқтар "Сыған серенадасын" айтты. Ол әнді базарлардан көп естіп жүрдім. Оны басқа жігіт айтады деп ойлаппын. Өзім орыс сыныбында оқығандықтан, қазақтың әншілеріне көп мән бермейді екенмін. Атағы шығып келе жатқан әнші екенін сол кезде білдім", – деп ағынан жарылды Бейбіт. 

Серіков бір көргеннен ұнатқан арудың жүрегін жаулау үшін неше түрлі әрекетке барған көрінеді. Бірде елдің алдында жыр арнаса, келесіде "сені түсімде көрдім, екеуміз қол ұстасып жүріппіз" деп алдаған. 

 "Мені қарату үшін неше түрлі жалған әңгімелер айтты. Аузым ашылып, сеніп қалдым", – деді Бейбіт.

Жұлдызды жұп біраз уақытқа дейін қарым-қатынасын жұрттан жасырып келген. Сейдуалиева ата-анадан, туған-туыстан ұялғанын жеткізді. Екеуінің де басы бос деп ойласа керек, фанаттар Тоқтарға да, Бейбітке де хат жазып, маза бермеген көрінеді. 

"Тоқтарға келген хаттарды бірге оқитынбыз. Ол – өнер адамы ғой. Неге қызғанамын? Маған да хат жазып, тіпті Тоқтардың өзінен телефонымды сұраған жігіттер болды. Онда тұрған ештеңе жоқ. Біз сол үшін жаралдық қой. Халыққа ұнау үшін, көзіне әдемі болып көріну үшін... Өнер не істетпеді? Бірақ әрі ешқайда кете қойған жоқпыз. Түзу жолмен жүрдік. Ешбір қауесетке, жаман атқа ілінген жоқпыз. 

Қыздар көп болды. Көзімше бетінен де, ернінен де сүйіп алған қыздар болды. Жағасын жұлып әкеткен қыздар да болды. Ол – өнер. Өнерде бәрі болады. Қызғана берсең, сыйластық та, ештеңе де қалмайды. Адам өзін меңгере білу, өзін ұстай білу керек", – деді Бейбіт.  

Stan.kz