Қазақстандықтардың миллиардтаған қарызы коллекторларға берілген

08 маусым 2022, 17:50

Коллекторлық агенттіктерге қазақстандықтардың жалпы сомасы 444 млрд теңге проблемалық несиелері берілген. Бұл туралы Ulysmedia.kz тілшісі LS-ке сілтеме жасап жазды, - деп хабарлайды Alashainasy.kz.

Қаржы нарығын реттеу агенттігінің дерегінше, сотқа дейінгі өндіріп алу мен реттеуге берілген берешектің 97% -ында(2022 жылғы 1 сәуірдегі жағдай бойынша) мерзімі өткен күндердің саны 90 күннен асып кеткен.

 

"Осы жылдың басында коллекторлық агенттіктерге жалпы сомасы 402 млрд теңге болатын 811 мың шарт бойынша берешек берілді. Бір жыл ішінде ол 2,1% – ға азайды (2021 жылғы 1 қаңтарға-795 мың шарт бойынша 410,7 млрд теңге). 2022 жылғы 1 сәуірдегі деректер бойынша осы ұйымдарға жалпы сомасы 444 млрд теңге болатын 915 мың шарт берілді", – деп хабарлады агенттіктегілер.

 

Берешектің жалпы көлемінің шамамен 89%- ын немесе 395 млрд теңгені банктер алдындағы міндеттемелер, 5%-ын немесе 24 млрд теңгені – микроқаржы ұйымдары алдындағы міндеттемелер, 6%-ын немесе 25 млрд теңгені өзге ұйымдар алдындағы міндеттемелер құрайды.

 

Агенттік өкілдері 2021 жылғы 1 қазаннан бастап банктер мен МҚҰ үшін азаматтардың несиелер бойынша мерзімі өткен берешегін реттеудің бірыңғай міндетті тәртібі енгізілгенін еске салды.

 

"Қаржы ұйымдары қарыз алушыны мерзімі өткен күннен бастап 20 күннен кешіктірмей хабардар етуге міндетті. Бұдан әрі жеке тұлға 30 күнтізбелік күн ішінде берешекті қайта құрылымдауға қатысты кредиторға жүгінуге және 15 күн ішінде жауап алуға құқылы", – делінген Қаржы нарығын реттеу агенттігінің хабарламасында.