Алаш арыстарын ұлт боп жоқтай алмағанымыз қандай өкінішті

31 мамыр 2021, 15:57

Қайбір жылы бұл күні мешітке бардым. Қолымда қағаз. Онда мен үшін ерекше жақын адамдардың аттары... Әлихан Бөкейханов, Ахмет Байтұрсынов, Сәкен Сейфуллин, Бейімбет Майлин, Ілияс Жансүгіров, Мұстафа Шоқай, тағысын тағылары... Молданың алдына қағазды қойдым. Құраннан кейін менің қағазымды молдекең оқи бастады. Үлкен мешіт болған соң, адамдар да көп жиналған. Алаш арыстарының аттарын оқи бастағанда, молдекең "бұл кісілер бұған кім" дегендей таңырқай қарады. Бірақ ерінбей барлық есімдерді оқып шықты. Кейбір адамдар таңданысын жасыра алмады, кейбіріне бұл есімдердің ешқандай да мағынасы болмады... Сол кезде ішімнен "құдай-ай, тәуелсіздікті жақындатқан, жерді сақтап қалған, ұлтты ұйыстырған, кейінгі ұрпаққа білім, мәдениет жағынан мол мұра қалдырған Алаш арыстарын ұлт боп жоқтай алмағанымыз қандай өкінішті" дедім. Бүгін Саяси қуғын-сүргін құрбандары мен ашаршылық құрбандарын еске алу күні. Ұмытпайық. Түркияда Ататүрік қалай дәріптелсе, Әлихандардың сондай деңгейдегі тұлға болғанын есте ұстайықшы... Жандары жәннатта болсын! Алла алдарынан жарылқасын! Тарихи әділдік орнасын.

facebook.com парақшасынан