Жұлдыз
Радиосы
Әпенді әкем-ай!..
-
Құралай Сейсенбекқызы
– Әке... Қызықсыз... Үйіңіздегі он адамның біреуі ғана табыс тауып отыр. 140 мыңға қарбызды неге алдыңыз?
– Өй, жаз мезгілі ғой, сатып алатындар шығады әлі.
– Қаншадан алдыңыз?
– 25-тен.
– 30-дан.
– Әке, оптом тұрмақ сатылымдағы қарбыздың өзі 25-тен түсіп кетті ғой! Шыныңызды айтыңызшы, неге алдыңыз?
– Жаным ашып кетті... Жап жас жігіт екен өзі...
– Біліп едім... Өткізе алмайсыз ау...
– Сен қыз-ақ білгішсің тегі. Көресің бір аптаның ішінде зуылдап өтіп кетеді әлі-ақ.
Араға үш апта салып ауылға бардым. Көшенің арғы бетіндегі қоқыста тау болып үйілген шірік қарбыздарды көзім шалды. Мен ішке кірген соң Анам үйден дәу-дәуін кезек-кезек көтеріп, дастарханға алып келіп жатыр.
– Біреуін сойсаңызшы, – десем әкемді нұсқап, саусағын мұрнының ұшына апарды. "Тыныш" деген белгісі екенін ұға қойдым. Сойылған бес қарбыздың бірі де жеуге жарамсыз болып шықты... Әкем маған бір қарап алып:
– Балаларым қарбызға қарық болды ғой. Олар жеп үлгерді әйтеуір. Сен ғой алыстан жетем дегенше срогы өтіп кетті, – деп қояды.
Анадайда қатар тұрған алты белесебедке көзім түсті. Әкем:
– Е, бірде бар, бірде жоқ болып жүрсек те балаларымнан аяғанымды ит жесін, – деді.
– Екеуі кішкентай емес пе әлі ?, – деппін әлі педаль басып, рульге отыра алмайтын екеуді ойға алып. Әкем:
– Өседі ғой!, – дегенде күліп жібердім.
Бірер күн бұрын хабарласып базарда күтіп тұрғанын айтты. Аман саулық, аз-кем әңгімеден соң:
– Телефоныңды бере тұршы, – деді. Бердім. Көліктің ішінде отырғанбыз. Теріс қарап сәл отырды да ұялымды қайтарды. Бірақ бергені менікі емес. Менің ұялымнан екі есе қымбат, әрі әдемі телефонды көріп түсінбей отырсам:
– Сенің соткаңа сондай қызыққан едім. Енді сенікінен екі есе «новороченныйын» алдым , – дегені.
Мен үнсіз отырып барып:
– Құтты болсын, қашан алдыңыз?
– Кредитке мамаң әперді...
Менің іштей тым қымбатқа алынған сотканы ұнатпай қалғанымды ұғып қалса керек
– Е,е қызым... Өмірімде бірінші рет сыйлық алып тұрмын. Алпысқа жылда толмаймын ғой, – деді. Мен ұялып қалдым...
Құралай Сейсенбекқызы
Facebook-тегі парақшасынан
Көрілген: 1787 Пікірлер: 0
