Қазақ өнері кәріз жүйесіне айналып болды ма?

Жазбайын десем жай таптырар емес. Күз келгенде аңсақ адам үйде отырушы ма еді. Бір апта бұрын «қос ауызды» көтеріп, бірнеше жігіт Іленің жағасына барып үйрек аттық. Аттық деген аты ғана. Мардымды ештеңе болған жоқ, еңбек қайтпады. Айтайын дегенім де ол емес.
Алматыдан 400 шақырым жер, құлазыған медиен дала. Шөпшілер-ау деймін, қостың басында үш адам шай ішіп, жайбарақат жатыр екен. Көк кабиналы трактордың екі есігі айқара ашық. «Мария Магдалина охо-хо, Талайдың арманы едің ехе-хе» деп ұ-ры-п жатыр. Ойпырмай, мидай далада да мына тексіз әуеннен құтыла алмайтын болдық. Енді қайда барамыз?
Не болып, кімге айналып бара жатырмыз осы? Қызы, бозбаласы, қатыны, еркегі, қызметкері, қатардағысы, ақылдысы, шала сауаттысы, шал-шауқаны мен кемпір-сәмпірі қосылып ауылда да, қалада да бәрі тегіс жын қаққандай осы әулекі әуенге селкілдейтін болыпты. «Шип-шип-шип» деп тауыққа бидай шашқандай шиқылдайды, қара терге түсіп жер тепсініп қиқулайды келіп. Осы әуенмен Құдай дескен құдасын күтеді, баласының тұсауын кеседі, туған күн тойлайды.
Калумбияда ұзындығы 1550 км, 260 мың шаршы метр алып жатқан, Кариб теңізіне құятын Магдалена деген өзен бар екен. «Күнәдан пәк» деп дәріптелетін, христиан дінінің негізін салушы Құдайдың расулы (адам бейнесіндегі Құдай) Ғайсаны (Иисус Христос) дүниеге әкелген Палестиналық Марияға да жақындығы байқалмады. Сөйтіп отырып мына бір қатынның суретін тауып алдым. Картина анықтамасында: «Рафаэль. «Магдалены Дони». 1506 жылдардың шамасы. Флоренция. Патти галереясы» депті. Интернеттегі Мария Магдалина суретіне қатты ұқсас, алайда бұл жерде егде әйел сияқты.

Әй, бауырлар, Құдайдан үмітіміз бар шығар. Әлде қазақ өнері өн бойынан кәкайдың небір көкесін өткізіп жатса да қыңқ етпейтін қоғамдық кәріз жүйесіне біржолата айналып болды ма? Олай болса ондай өнердің кімге керегі бар? Осы біздің әулекі әншілер кімді, қандай музыканы насихаттап жүр? Мынау дегенің христиан әлемінің қаны сорғалап тұрған жарнамасы ғой! Өзі Иса мәсіхтің шарапатын көрген бойжеткен болса... Жүгенсіз кеттік қой. Кімнің не білгені бар? Ендігі жерде кәкайдан ысқырық жасап тартпаған неміз қалды. Ортаға ой салайық та!
Берік Жүсіпов
Facebook-тегі парақшасынан