Оның зардабы ауыр болуы да бек мүмкін...

16 наурыз 2021, 10:20

Бала кезім ғой. Ауылда газ түгілі, жылдап свет болмайтын уақыт. Алматыға ағамның үйіне қыдырып бардық. Бір кезде анам:
- Ержан, газды өшіре салшы – деді.
Бардым да, газдың тұтқасын олай бұрадым, өшпейді, бұлай бұрадым, өшпейді. Сосын, тұрдым да, бар күшіммен үпіріп қалып едім, газ өшті. Тапсырманы бұлжытпай орындағандай, «өшірдім» - деп келдім танауым таңқиып.
Бір кезде жеңгем: - Газдың иісі шыға ма? – деді де, жүгіріп кетті.
- Газ ашық қалып кетіпті – деп, терезенің бәрін ашып жатыр.
- Әй, сен газды өшірдім деген жоқ па едің? – деді анам сұрланып.
- Иә, өшірдім ғой, үпіріп – дедім мен де.
Сол күні анамнан оңбай таяқ жеп едім.
Үш-төрт жыл бойы табиғи газ түгілі баллон газ көрмеген мен қандай қауіпті тірлік істегенімді қайдан білейін?! Кінәмді сезінген де жоқпын.
Ал, қазір Қазақстан территориясының тек 40 пайызға жуығы ғана газдандырылған. Көп ауылдарға әлі көгілдір отын тартылмаған да. Оған тасымалдаушы жеке меншік компаниялардың шамасы да, құлқы да жоқ. Көп бала газдың не екенін білмейді де.
Көгілдір отын тартылған елдімекендердің газ құбырлары отыз жылдан бері жаңартылмаған. Мамандар газ құбырларының 75 пайызы ескірген деп дабыл қағып отыр. Кез келген уақытта ескі құбырлардан утечка кетуі ықтимал. Оның зардабы ауыр болуы да бек мүмкін. Құбырларды жаңартуға газ тасымалдаушы компанияның шамасы жете ме?

Ержан Тәліп

Фейсбуктегі парақшасынан