Мистика. Қиял-ғажайып. Түс жору

Ананың қарғысы

  • http://nur-jan.webpress.kz/

    http://nur-jan.webpress.kz/

Әлімнің бұл ауылға әкім болып сайланғанына үш-ақ күн. Сайлауға түсерінде ауыл жағдайын зерттеп-зерделегенмен, халықпен кездесіп, емен-жарқын сөйлесу үшін ауылдың жай-жағдайымен танысып алғанды жөн көріп хатшысына құжаттарды алдырып қарай бастағаны сол еді жанындағы ақ телефон безілдеп қоя берді.

 

- «Жаңаөркен» ауылының әкімі Әлім Талапов тыңдап тұр.

 

- Әлім, саламатсыз ба? Мен аудан әкімдігінен Орынбаймын ғой. Сізге аудан әкімінің алғашқы тапсырмасы. Екі күннен соң ауданға облыс басшысы келіп ауылдарды аралайды. Үлкен кісі бас сұғатын мекеме, мектепті, аралағанда жүретін жолдағы көзге оғаш көрінетін жерлерді ретке келтіру керек. Сырлап, әктеп дегендей... Тіп­тен болмай жатса тасалап қоршай саларсыз. Алғашқы тапсырма екенін ұмытпаңыз, - деп телефон тұтқасын қойып қойды.

 

- Аға, жай ма?, - деген хатшысына:

 

- Екі күннен кейін облыс басшысы келіп ауылдарды аралайтын көрінеді. Соған дайындық жасауымыз керек. Түсінесің ғой, көше тазалау, тәртіпке келтіру дегендей, - деді де, есіне бір нәрсе түсіп орнынан тұрып «жүр», - деді хатшысына.

 

Сыртқа шығып өзінің жеке көлігін от алдырды да, ауылдың кіре берісіндегі кеше өзі көрген көріксіздеу үйге бет алды.

 

Бұлардың көлігі келіп тоқтағанда екі-үш ешкі үрке жөнелді де, қызыл ала сиыр басын марғау бұрып, күйіс қайтарып тұра берді.

 

Кең аула. Ара-тұра шыққан пішен сүйрігі болмаса, көбісі арам шөп. Төрде бір кездері еңселі болған үйдің ұлым-жұлым қаңқасы ғана тұр. Терезелері үңірейіп, қалқиған қабырғалары мен қалбиған пештің мұржасы сорайып тым сүреңсіз көрінеді.

 

Арам шөптер ортасында тең болып түйілген киіз үйдің жабулары мен сынған уықтардың үстінде күнге күйіп қаңсыған қара шаңырақ жатыр.

 

Мына көрініс Әлімнің көңілін құлазытып жіберді. Көлікке отырғасын да от алдырмай біраз отырды. Ізіне еріп жүріп осыны көрген хатшысы да үндемеді. Сәлден кейін:

 

- Бұл кімнің үйі, білесің бе?, - деді. Хатшысы:

 

- Совхоз кезінде директордың үйі болған деп атам айтып отыратын, - деді.

 

- Атаң бар ма?, - деп сұрауын сұраса да, ығайсызданып хатшысына қарады.

 

- Бар, аудан әкімі сізді ауылға таныстырғанда сөз сөйлеп, бата берген қария, - деді.

 

- Онда қарияға сәлем берейін, - деп көлігін от алдыра бастаған Әлім иығынын бір зіл түскендей жеңілдеп сала берді.

 

 

* * *

 

- Иә, шырағым, қызметіңді үлкенге сәлем беруден бастауың, ауылдың сүреңсіз жайларына көңіл бөлуің ұнап отыр. Біреулердің атын атап, түсін түстемей-ақ қояйын. Ол жай ауылдың кәрі-жасына аян болғанмен, ауызға ала бермейтін едік. Қолқа салған екенсің айтайын.

 

Сырттан келген бір азамат осы совхозда ­директор болды. Сол замандағы талап па, әлде қанында бар ма қаталдау еді. Қызметін де жақсы бастап еді. Бірақ түбіне өр көкіректігі жетті-ау деп ойлаймын. Өзін қарапайым жұмысшыдан үнемі жоғары санап жүретін. Ауылда жалғыз кемпірдің тракторшы ұлы болды. Көзі қарақты, зерек, білімді болып өсті. Мектепті озат оқушының бірі болып бітіргенмен қолы қысқалықтан оқуға бара алмады. СПТУ бітіріп тракторшы болып ­ауылда анасының жанында қалды. Аудандық ­газетке мақала жазатыны, өлең шығаратыны бар, келісті азамат болып өсті. «Ел мақтаған жігітті қыз жақтаған», - деген емес пе, ауылдың көп қыздары жақсы жігітті жақтап жүрді. Соның бірі директордың қызы. Өзі де ажарлы еді. Оның үстіне үлде мен бүлдеге оранғасын тіптен ажарланып кетті. Аядай ауыл келін-кепшік, әйелдер түгілі біздің құлағымызға дейін «тракторшы жігіт пен директордың қызының ара жақындығы бар екен, жарасып-ақ жүр», - деген сөз жетіп жүрді.

 

Қыз Алматыда оқуда жүргенмен хаттары үзілмей, келсе екеуінің жұптары жазылмай жүргені директорға ұнамады. Қысқасы, қайдағы бір жетім тракторшыға үлде мен бүлдеге орап отырған қызын бергісі келмеді. Оның үстіне байғұс бала совхоздағы кейбір келеңсіз жағдайларды газетке жазып, директорға аудан басшылары ескерту беріпті, - деп те естідік. Содан есебін тауып ол жігіттің тракторын тартып алып, қойдың соңына салып, қойшыны куә қылып, жоғалған төлдерді «ұрлады» деп соттатып жіберді.

 

Сауатты бала ғой, алты жылға сотталса да ізденіп, бір жарым жылда босатылғанымен өкпе ауыруына шалдығып келді. Сөйтіп жүргенде ауыл тағы дүрлікті. «Директордың қызы тракторшы жігіттен екі қабат екен», - деп. Сөздің қысқасы, байғұс балаға қараспанның қара бұлты қайта үйірілді. Қатыгез әке қызының «тракторшы жігітті жақсы көретінін, бас қосқысы келетінін, бар жағдай өз еріктерімен болғанын еңіреп айтса да еміренбеген әке, жалған құжаттар жасап, жазықсыз жанды «қызды зорлады», - деп абақтыға қаматты.

 

Әлі есімде, жігіттің анасы ауылдағы ақса­қалдарға, ауыл советтің председателіне, кәсіп­одақ комитетінің төрағасына жалынды. «Мені алып барып, кешірім алып беріңдер, қара орманымды, менің өзімді кепілге алса да баламды енді соттатпасын. Енді түрмеге кетсе, баламды көре алмайтынымды ішім сезеді», - деп еңірегенде етегі толды. Сабаздар-ай, біреуі тырп етпеді-ау. Ол кезде жәй күрішшімін мен жігіттің анасын ертіп жаңағы сен көрген үйге бардық. Келісті үйдің кең ауласына алты қанат ақ үйді тігіп, ішін жиһаздап-ақ тастаған екен, төрінде қолтығына құс жастық ­жастанып директор қисайып жатыр. Бізге аларып бір қарады. Шай құйып отырған әйелі:

 

- Жоғарылатыңыздар, төрлетіңіздер..., - деп орнынан тұра беріп еді, директор:

 

- Отыр орныңа, шошаңдамай, менің төріме шығатын осылар ма... Сөздеріңді шығындамай-ақ қойыңдар... есік анау, - деді дауысын көтеріп, қолын шолтаңдатып.

 

Сонда байғұс ана:

 

- Әй, көзіңді шел қаптайын деген екен... Жалғызым үшін алдыңда тізерлеп кешірім сұрайын деп келіп едім. Алла енді сенің алдыңда тіземді бүктірмесін. Жалғызымды бір Аллаға тапсырдым. Бізді лайық көрмеген төріңе адам шықпасын, ордалы жылан жайласын, аулаңды арам шөп бассын. Бала-шағаңнан аулақ, - деп екі алақанымен бетін сыйпағанда жүзі қара сұрланып, шүңірек көздері от шашып тұр екен. «Қарғысының түрін..!», - деп кекесінмен мырс еткен директорға жонымызды беріп сыртқа беттедік.

 

Тракторшы жігіт бір жарым-ай абақтыда жатып, «зорлады» деген қағазға қыздың өзі қол қоймағасын сотталмай қалды. Бірақ анасы оны көре алмай, жүрегіне түскен сары уайым салмақтан көз жұмған еді. Ал қызды әкесі Қалақалпақстанға әйелі өлген біреуге күштеп беріп жіберіпті.

 

Көлденеңнен келген дүние көзге түспей тұра ма, көп ұзамай директорымыз да әңгімелі болып сотталып, сол жақта біреулердің қолынан қаза тапты деп естідік. Жанашыр жан болмады ма, сүйегі сол жақта қалды. Бұл Алланың құдіретін қара. Көп ұзамай тракторшы жігіт пен директордың әйелі бір күнде қайтыс болды. Директордың әйелін жерлеуге жақын туыстарынан басқа адам бармады. Тіпті Армияға барып, Ресейде қалып қойған баласы да, Қарақалпақстандағы қызы да келмеді. Ал тракторшы жігітті бүкіл ауыл болып шығарып салды. Кластастары мен ауыл жастары тік тұрып қызмет жасады.

 

Өткен жылы тракторшы жігіттің кластастары жиырма бес жылдан кейін бас қосты. Тракторшы жігіт пен анасының бейіттеріне барып құран бағыштады. Араларында қасында тракторшы жігіттен айнымайтын боз баласымен директордың қызы да жүрді.

 

Ал, сен көрген үйді алуға келгендер үйдің ішінде, киіз үйдің теңінде жыландар толып жүргенін көріп жоламай кетті. Қарғыстан болды ма, көлге жақын, адам көп бармайтын үй болғасын солай болды ма, ол Аллаға ғана аян. Кейбіреулер директордың әйелін де жылан шағып өлтірді, адамға зияны жоқ кісі еді, жұбайының кесірі тиді-ау деп жүр. Бірақ, жанына жайылған малды жылан шақты дегенді естігенім жоқ, - деп қария сөзін аяқтады.

 

Қариямен қоштасып, «ашынған ананың қарғысы текке кетпейді», - деген осы ­екен-ау, - деп ойлаған Әлім, «ол жерді үлкен басшы көрмейтіндей етіп қоршасам ба екен, әлде көрген жандарға ой салар орын болып тұра берсе қайтеді екен», - деп келе жатты.

 

nur-jan.webpress.kz




Көрілген: 3392    Пікірлер: 0

жұма, 12.06.2020, 16:06

Достарыңмен бөліс:

  • СОҢҒЫ ЖАРИЯЛАНЫМДАР:
    26 Қыркүйек, 11:50
    О дүниеден оралған жігіт
    25 Қыркүйек, 13:49
    Жын мен жігіт
    24 Қыркүйек, 14:37
    Көріпкелге бармаңыз...
    21 Қыркүйек, 14:17
    Гипнозбен тонап кетті...
    17 Қыркүйек, 14:27
    Алтын көшкен түн
    15 Қыркүйек, 13:58
    Пері соққан Болатқан...
    9 Қыркүйек, 13:31
    Әкенің киесі...
    2 Қыркүйек, 15:02
    Бір түнде қартайған екен
    11 Тамыз, 15:02
    Мәйітханадағы түн
    19 Шілде, 21:29
    Періште мен сайтан

    Көп ашылған Көп пікір жазылған
    2020
    2008
    2009
    2010
    2011
    2012
    2013
    2014
    2015
    2016
    2017
    2018
    2019
    2020
    қазан
    қаңтар
    ақпан
    наурыз
    сәуір
    мамыр
    маусым
    шілде
    тамыз
    қыркүйек
    қазан
    қараша
    желтоқсан

    Алаш Айнасы мұрағаты

    Дс Сс Ср Бс Жм Сн Жс
    1 2 3 4
    5 6 7 8 9 10 11
    12 13 14 15 16 17 18
    19 20 21 22 23 24 25
    26 27 28 29 30 31