Құрбан айтты қалай тойлағыңыз келеді?

26 қазан 2012, 11:50

Сонымен, әр шаңырақ шама-шарқы келгенше құрбан шалып, исламға тән игі дәстүрімізді дәріптеуге дайындығымыз қалай? Құрбан айтты кім, қалай тойлағысы келеді?
Ерлан ЖАҚЫП, «АҚШЫҢ» корпорациясы президентінің кеңесшісі:
– Құрбан айтты келешекте ұжым болып тойлауға мән берсек. Жаңа жылды қарсы алғанда бәріміз жұмыла кірісіп, не істейтінімізді, қайда атап өтетінімізді бір-бірімізбен ақылдасып жататынымыз бар. Ал Құрбан айтты неге солай ұйымдастырмасқа?! Әрине, оның да өзіндік ерекшелігі, мәні бар. Есесіне, Жаңа жылға қарағанда мұның ұрпақ бойына ұялатар жақсылығы, ол ұғынар тағылымы мол ғой. Әрі үш күндік мереке, әр шаңырақ алғашқы күнде келетін қонақтарын өз үйінде қарсы алып, келесі күні ағайын-туысты аралап, үшінші күні ұжымдық Құрбан айт дастарқанына келсе қандай жарасымды болар еді деп ойлаймын.

Қазбек ҚЫДЫРБАЕВ, қала тұрғыны:
– Менің ойымша, мереке күндері халыққа қызмет көрсету түрлері енгізілсе деймін. Дәмхана-кафелер бұл күні арақ-шарап сатуды үш күнге тоқтатып, орнына сөресін қымыз, шұбат, айранға толтырып қойса, мұны жұрт қуана қабылдайтыны анық. Әрі мұның кафе иесінің беделін көтеруге ықпал етеріне шүбә жоқ.

Шұғыла МЕЙІРМАНОВА, әлеуметтік көмек көрсету орталығының логопед-маманы:
– Бір білетінім, Құрбан айтты жас отбасылар да ел қатарлы қарсы алып, қонақ күткісі келеді. Өздері де қонақ болсақ дейді. Алайда олардың барлығының жағдайы бірдей емес қой. Бірі жатақханада, бірі пәтерде тұратындықтан, айтшылап келетін ағайынды қалай қарсы алам деп қысылады. Мен ойлаймын, Құрбан айт, мұсылман қауымына ортақ мереке болғандықтан, әр қалада Наурыз мерекесіндегідей алаңдарда арнайы дастарқан жайылып, жұрт бір-біріне ізгі тілектерін арнап жатса. Көпшілік Аллаға деген тәубесін, разылығын сондай жерлерде білдіріп жатса қандай жарасымды болар еді.