Ана денсаулығы бәрінен қымбат
Ана – шаңырақтың шуағы, отбасының бақыты мен берекесі. «Ана» деген ардақты атқа ие болған әрбір әйел затының алдында өскелең ұрпаққа деген жауапкершілік міндеті тұр. Ана денсаулығы бүгінгі заманның көкейкесті мәселелерінің бірі. Дана халқымыз «Ақылды әйел ішінде, алтын бесікті ұл жатар» деген мақалды текке айтпаса керек-ті.
Қоғамдағы кейбір қыз-келіншектердің шылым шегіп, түрлі ішімдіктерге әуес боп, ашық-шашық жүргенін көрген кезде қай анамыз осындай үлгі берген еді деп қайран қалар тұстарымыз да жоқ емес.
Сала мамандарының берген мәліметтеріне сүйенсек, жас қыздардың 30 пайызының ғана денсаулығы қанағаттанарлық деңгейде екен. Демек, қалған 70 пайыз қаракөздеріміз ана болуға аса қабілетті емес. Оның ішінде 47,4 пайыз қыздар асқазан-ішек жолдарының дерттеріне шалдықса, 30,8 пайызын несеп, зәр жүйесі аурулары мазалайды екен. Сондай-ақ 12,5 пайызы эндокриндік жүйе ауруымен ауырады. Бұдан кейін ананың бойындағы дерт іште жатқан балаға да тікелей зиян келтіреді. Ана денсаулығы дұрыс болмаса, одан туар бала қандай болмақ? Міне, осы мәселе бізді қатты алаңдатады.
Көптеген дәрігерлер «ата-аналар дәрігерлер берген емдеу шараларын баланың беті бері қараса болды тоқтатып қояды, толық курсты аяқтамайды. Соның салдарынан вирус бала ағзасында қалады. Жас нәрестеге дұрыс күтім жасамайды, ауырған баланы дер кезінде дәрігерге көрсетпейді, дұрыс тамақтандырмайды» деген сыңайдағы уәждерін айтады. Ал ата-аналар қауымы: «Дәрігерлер вирусты антибиотиктермен емдеу арқылы жас ағзаларды улап жатыр. Біз сондықтан дәрі-дәрмекті алғашқы көмек ретінде ғана пайдалануға тырысамыз» дегенді алға тартады. Әжелеріміз «Басқаны қайдам, біз кішкене күнімізде аналарымызға ауырған жерімізді сылап-сипатып, ұшықтатып алып шауып кететінбіз» деп келіндері мен ұл-қыздарының баланың асты-үстіне түсіп немесе бірден дәрігерге ала жүгіретініне көңілдері толмайтындығын жеткізді.
Бұрын еліміз ана мен бала өлімінің көрсеткіші бойынша әлемде алғашқы орындардың бірінен көрінетін. Десе де, бүгінгі таңда Елбасының тапсырмаларын амалға асыра білген Үкімет ширек ғасыр ішінде оң нәтижелерге қол жеткізді. Ана мен бала өлімінің көрсеткіші бірнеше есеге азайды. Егемендіктің алғашқы жылдары босанған 1000 әйелдің 67-сі қайтыс болса, 2015 жылы бұл көрсеткіш 12-ге дейін төмендеген. Ал балалар өлімі 27-ден 9-ға азайды. Бұл көрсеткіштердің жақсаруы халық санының өсуіне оң ықпал етті. Статистикаға сүйенсек, Тәуелсіздік алған 25 жылда халық саны 1 миллион 200 мыңға артқан. (Zanmedia.kz)
Халық санын арттыру, ұлттың сапасын жақсарту – бүгінгі таңдағы басты мәселелердің бірі. Ол үшін дені сау ұрпақты өмірге әкеліп, қоғамда салауатты өмір салтын қалыптастыруымыз керек.
Абылайхан ЖҰМАШЕВ
anatili.kazgazeta.kz