Клиенттің бар ақшасын телефон арқылы сыпырып алды

09 қазан 2021, 16:33

Нұр-Сұлтанда жолаушының ақшасын телефон банкингі арқылы өзіне аударып алған такси жүргізушісі ұсталды. Ұялы қосымша арқылы 143 880 теңге көлемінде ақша аударылған, деп хабарлайды Express Qazaqstan.

 

Бұл туралы Нұр-Сұлтан қалалық ПД-нің баспасөз қызметі мәлімдеді.

 

Елорда тұрғыны таксиде телефонын түсіріп алғанын айтып полицияға жүгінген. Смартфон өз иесіне қайтарылғанымен "Сбербанк" ұялы қосымшасында қаражат ұшты-күйлі жоқ. Тергеу жұмыстары нәтижесінде жәбірленушінің телефонынан 143 880 теңге қаражат аударылғаны анықталды.

 

24 жастағы такси жүргізушісі көлікте қалып қойған телефонды алып, банк қосымшасындағы бар қаражатты өзіне аударып алған. "Құпия сөзді ұмыттым" деген батырманы басып оның қайта тіркелгені белгілі болды.

 

Аталған дерек бойынша қылмыстық іс қозғалды, деп мәлімдеді елордалық ПД-нің баспасөз қызметі.