Ресейден көлік алуға көмектесетінін айтқан өскемендік алаяқ 2,6 млн теңге пайда көрген

27 желтоқсан 2022, 09:16

ШҚО тұрғындарына Ресейден көлік алуға көмектесетінін айтқан алаяқ 2,6 млн теңге пайда көрген, деп хабарлайды ҚазАқпарат тілшісі.

ШҚО полиция департаменті баспасөз қызметінің мәліметіне сүйенсек, қалалық ПБ Ертіс полиция бөлімінің тәртіп сақшылары Ресейден көлік алуға көмектесетінін айтып, тұрғындарды алдаған әйелді қолға түсірді.

28 жастағы өскемендік 3 ұқсас қылмыс жасағаны үшін күдікке ілінген.

«Әйел адам Ресей Федерациясынан автокөлік жеткізіп беремін деп алдап, Глубокое ауданының тұрғындарынан шамамен 2 600 000 теңге ақша алған. Алайда арада біраз уақыт өткенде тұрғындарға көлік те жеткізілмеді, ақшасы да қайтарылмады. Сол кезде алданып қалғанын түсінген олар полицияға хабарласқан», - делінген ақпаратта.

Қазіргі уақытта алаяқ тергеу изоляторына қамауға алынған.

Аталған факті бойынша ҚР ҚК-нің 190-бабы 1-бөлігімен қылмыстық іс қозғалды.