Алматының таулы аудандарында құрылысқа тыйым салу ұсынылды

19 мамыр 2022, 11:03

Алматының табиғат қорғау прокуратурасы таулы аудандардағы құрылысқа тыйым салуды ұсынды, - деп хабарлайды Tengrinews.kz тілшісі прокуратураға сілтеме жасап. 

Таулы аймақта құрылыс салу және алма бақтарды кесу жағдайларының жиіленіп кетуіне байланысты мамандандырылған табиғат қорғау прокуратурасы талдау жүргізді.

Прокуратура өкілдері мұндай жерлерде құрылыстың қарқынды жүруінің себебі - бұрын жер пайдаланушыларға жерге меншік құқығы беріліп, құрылысқа тыйым салу үшін құқықтық негіздер болмады дейді.  

"Осы мәселені талдау қорытындылары бойынша біз қала әкімдігіне таулы жердегі жер учаскелерін рекреациялық аймаққа жатқызу мәселесін қарауды ұсынып қадағалау актісін енгіздік, бұл заң бойынша көрсетілген аймақта жаңа объектілердің құрылысына тыйым салуға мүмкіндік береді. Аталған ұсыныстар қолдау тауып, егжей-тегжейлі жоспарлау жоспарына және қала құрылысының Бас жоспарына әкімдік тиісті өзгерістер енгізетін болады. Ағымдағы жылдың маусым айында оларды бекіту күтілуде. Сондай-ақ, осы талдау барысында Обсерватория көшесінде тұрғын үй құрылысы кезінде алма бақтарын заңсыз кесу дерегі анықталды", - делінген хабарламада.
 
Табиғат қорғау прокуратурасының үйлестіруімен Медеу аудандық полиция басқармасы осы дерек бойынша соталды тергеуді бастап, оның тергеу барысы бақылауға алынды.