Банкрот болғанның қарызы кешірілмейді. Қаржы министрлігі Сенаттағы дөңгелек үстелде жеке тұлғалардың банкроттық жариялау процесін түсіндірді, деп хабарлайды Zakon.kz "Астана" телеарнасына сілтеме жасап.
Борышкер 5 жылға дейін несие рәсімдей алмайды. Жеке тұлғаның қаржылық жағдайына мониторинг жүргізіледі.
"Соттың шешіміне сәйкес, банкрот болған борышкердің міндетін өтеу мерзімі өткен деп саналады. Кредиторлар борышкерден қарызын өтеуін талап ете алмайды. Борышкерге айыппұл салу және сыйақы есептеу автоматты түрде тоқтатылады. Әрине, банкрот болған борышкерге несие алу, кепіл қою және өздігінен мәміле жасауға тыйым салынады", - дейді ҚР қаржы вице-министрі Ержан Біржанов.
Министрлік өкілінің сөзінше, атаулы әлеуметтік көмек алатындар да өздерін банкрот деп жариялай алады. Дегенмен депутаттар мұнымен келіспей отыр.
Айта кетейік, 7 миллионнан астам отандасымыздың берешегі бар.