Пайдалы қазбалардың жаңа қорларын ашу жұмыстары мардымсыз жүруде - Әлихан Смайылов

20 желтоқсан 2022, 11:32

Үкімет отырысында геология саласын дамытудың 2023-2027 жылдарға арналған тұжырымдамасы туралы айтылды, - деп хабарлайды Alashainasy.kz ҚР Үкіметінің ресми Telegram-каналына сілтеме жасап.

Қазақстан минералдық-шикізаттық ресурстардың саны мен түрі жағынан әлемде жетекші орындардың қатарында.

Дегенмен біздің еліміз осы табиғи артықшылықты толықтай пайдалана алмай отыр. Соңғы жылдары пайдалы қазбалардың көптеген түрі бойынша жаңа қорларды ашу жұмыстары мардымсыз жүруде.

Мысалы, таяу онжылдықта Шығыс Қазақстанда Орлов, Малеев, Тишинское және Риддер-Сокольное сияқты ірі металл кен орындары игерілетін болады.

Өнеркәсіптік шикізатқа сұраныстың өсуі жаңа кен орындарын іздеп-тауып, минералдық-шикізат базасын кешенді дамытуды талап етеді. 

Осыған байланысты геологиялық барлау саласына инвестициялар тарту үшін тиісті жағдай жасау қажет.

Инвесторларға кешенді сервистік қолдау көрсету мақсатында Ұлттық геологиялық қызмет құрылды.

KAZNEDRA ақпараттық платформасы пилоттық режимде жұмыс істеп тұр.

Жер қойнауын пайдалану саласында нормативтік-құқықтық база түбегейлі өзгерді.

Жер қойнауы мен геологиялық ақпарат барынша қолжетімді болды.

Кен орнын ашқан компаниялардың оны әрі қарай игеру үшін құқықтарын қорғау күшейтілді.

Лицензия беру тәртібі кен орындарын игеруге құқық беру мерзімін едәуір қысқартты.

«Бүгін қаралып отырған Тұжырымдама жер қойнауын мемлекеттік геологиялық зерттеудің тиімділігін арттыруға бағытталған жаңа шаралар ескеріле отырып, әзірленді. Онда саланы цифрландыру, инфрақұрылымды дамыту, кадрлық әлеуетті арттыру сияқты саланы дамытудың басым бағыттары көрініс тапқан», — деді Премьер-Министр Әлихан Смайылов.