"Өнер қырандары" театры Алматыдағы Республика сарайымен келіспей, концерт өткізетінін хабарлап, билет сатқан деп хабарлайды Экспресс К.
Желіде 24-25 желтоқсанында Республика сарайында "Өнер қырандары — Харекет қорына 5 жыл" іс-шарасын өткізу туралы жалған ақпарат тарауда. Бұл туралы "Алматы әуендері" хабарлады.
Ұйымдастырушымен аталған іс-шараны өткізуге шарт жасалмаған. Сонымен қатар аталған күндері Республика сарайында "Жаңа жылдық шоу" өткізу жоспарланған, - делінген хабарламада.
Осыған қарамастан "Харекет" қайырымдылық қоры" ҚҚ және "Өнер қырандары" театрының өкілдері іс-шараны өткізу туралы жалған ақпарат таратуды жалғастырып жатыр екен.
Сондай-ақ билеттерді Kassir.kz арқылы сатқан. Тиісті құқық органдарының тексеруімен аталған шараның өту күні жалған екені анықталды, - делінген хабарламада.
Енді 24- 25 желтоқсанда өтетін "Өнер қырандары — Харекет қорына 5 жыл" концертіне сатылған барлық билеттің күші жойылды. Билет ақшасы kassir.kz сайтында белгіленген ереже бойынша қайтарылмақ.