Алматы облысында 7 жастағы қызды талап тастады

08 маусым 2022, 15:55

Алматы облысы Талғар ауданы Тұздыбастау ауылында жеті жасар қызды көршісінің екі бірдей иті талап тастағаны белгілі болды. Бүлдіршін қазір ауыр жарақаттармен ауруханада жатыр, - деп хабарлайды Alashainasy.kz тілшісі "Sputnik Қазақстан"-ға сілтеме жасап.

Әлеуметтік желіде қызды талаған алабайдың видеосы жарияланды. Оны қыздың әкесі түсірген. Қызға бір емес, бірден екі алабай шабуыл жасаған. Видеодан иттердің біреуін ғана көруге болады, екінші ит қайда екені белгісіз.

 

Әкесінің сөзіне қарағанда, жеті жасар қызын сіңілісінің көзінше екі ит әбден талаған. Балалар бұл уақытта көшеде ойнап жүрді. Көршісі қақпаны ішінен ілмеген, иттер аулада бос жүрген.

 

Оқиғаға қатысты қылмыстық іс қозғалды. Ауылдық округ әкімі Мирас Баймолдановтың айтуынша, полиция қызметкерлері сотқа дейінгі тергеуді бастады. Іс қылмыстық кодекстің 114-бабы 3-бөлігі бойынша қозғалды. Атап айтқанда, абайсызда денсаулыққа ауыр зиян келтіру.

 

Аталған бап бойынша ит иесі бір жылға дейін бас бостандығынан айырылуы мүмкін. Сондай-ақ Талғар ауданының полиция қызметкерлері иттің иесі 57 жастағы жергілікті тұрғын екенін анықтады.

 

"Ол иттерді қоршауда ұстайтынын айтты. Аулаға оларды тамақтандыру және серуендету үшін жіберген. Сол кезде жартылай ашық қақпадан екі алабай сыртқа атып шығып, балаға тап берген. Әйел зардап шеккен қызды емдеуге көмектесуге дайын екенін жеткізді", – делінген Алматы облысы ПД баспасөз қызметінің ақпаратында.

 

Полиция департаментінің баспасөз қызметінің мәліметінше, қазіргі уақытта барлық қажетті тергеу шаралары жүргізіліп жатыр. Сараптамалық тексерулер тағайындалды, олар бала ауруханадан шыққаннан кейін жүргізіледі.

 

Сараптамалардың қорытындысына сәйкес іс бойынша соңғы процессуалдық шешім қабылданатын көрінеді.

 

Еске салсақ, Алматы облысында жеті жасар қызды көршісінің иті талағаны туралы ақпарат тарады. Ит иесі зардап шеккен баланың еміне деп 30 мың теңге берген. Алайда ата-анасы қабаған иттің иесінің немқұрайлылығы үшін жазаны күшейтуді және пластикалық операцияға ақша беруін талап етті.