Екібастұзда төрт жасар қыз балабақшадан кетіп қалғаны үшін мекеменің жетекшісі мен тәрбиеші жұмыстан қуылды деп хабарлайды pavlodarnews.kz.
Дереккөз мәліметінше, күндізгі сағат 11:45 шамасында серуендеу кезінде орта топтағы бүлдіршіндердің бірі "Балбөбек" балабақшасынан өз бетінше кетіп қалады. Тәрбиеші өзге балаларды топқа жинап, тамақтарына отырғызған. Осыдан кейін Айтжан Шаймерденованың жұмыс уақыты аяқталып, екінші тәрбиешіге жоғалған бала туралы ескертпестен шығып кетеді.
Балабақшадан кетіп, жалғыз өзі жүрген қызды полиция қызметкерлері дүкен жанынан байқап қалады. Олар бірден білім бөліміне хабар беріп, баланы бөлімшеге жеткізген.
Содан кейін жоғалған қызды балабақшалар тізімінен іздеп тауып, оны әжесі мен мектепке дейінгі білім беру мекемесінің жетекшісі алып кеткен.
Қалалық білім бөлімі балаға жауапсыз қараған тәрбиеші Айтжан Шаймерденова мен балабақшаның жетекшісі Лейла Оразбаеваның жұмыстан босатылғанын мәлім етті.