• Елбасының құттықтау жеделхаты
Қазақстандық спортшы Светлана Подобедоваға !
Лондондағы ХХХ  жазғы Олимпиялық ойындардың ауыр атлетика сынындағы жеңісіңмен құттықтаймын!

Шиеленіскен бәсекеге қарамастан, сен біздің елімізді әлемдік ойындарда лайықты таныта алдың. Сен жеңіп алған алтын медаль – жоғары шеберліктің, мықты ерік-жігердің және рухтың бекемдігінің көрсеткіші.
Сенің көптеген спорттық жетістіктеріңнің қатарында енді Олимпиада чемпионы атағы бары да өте қуанышты.
Саған табыстар және жаңа жеңістер тілеймін!

3 тамызда Лондондағы ХХХ жазғы Олимпиада ойындарында ел қоржынына төртінші алтын медаль түсті. Бұл – екі дүркін әлем чемпионы Светлана Подобедованың жеңісі болатын. Аса тартысты өткен бәсекеде Света отандастарынан басым түсті. 75 келіге дейінгі ауыр атлеттер бәсекесін де талдықорғандықтар тағатсыздана күткен болатын. Ауыр атлеттер алтынға қол созған сәттен бастап қалада жастар күшімен тұрақты жанкүйерлер клубы құрылды. Олар бәсекенің барлығын тікелей эфирден тамашалап, отандастарымыз үшін жан-жүрегімен күйзеліп, жеңістеріне қуанып жүретін. Шыны керек, Светаға оңай болған жоқ.

Жұлқа көтеруде алғашқы мүмкіндігін мүлт жіберген ол 130 келімен жаттығуды аяқ­тады. Ал ресейлік Наталья Заболотная 131 келіні басынан асырып, Олимпиада рекордын жаңартты. Әрине, бұл сәт Света үшін психо­ло­­гиялық тұрғыда әсер етпеді деу қиын. Себебі осыдан алты жыл бұрын Света дәл осы Наталья мен Надеждалардың кесірінен Ресейден кеткен болатын. Бірінші жаттығуда На­дежда Евстюхина (Ресей, 2011 жылғы әлем чемпионы) ойламаған жерден үш ретте де 125 келіні көтере алмай жарыстан шығып қалды. Моральдық тұрғыда, іреудің нала­сына қуану дұрыс емес екенін білсек те, жан­күйерлер болып сол сәтте бөркімізді аспанға аттық. Ендігі қарсылас тек Заболотная, Светада кемінде күміс бар деп қуандық. Білікті бап­кер­лердің арқасында сол күмісіміз серпе көтеру сынын­да алтынға айналды. Үшінші мүмкіндігінде Н.Заболотная 160 келіні бағындырды. Ал Света 161 келіге тапсырыс берді. Күдік пен үміт араласқан 2 минут өтіп бітпей қойды. Подо­бедованың 161 келі батпанды басынан асыра көтергенде ғана аһ ұрып айқайлап, қуаныштан Алек­сей Ни секілді секіргеніміз есімде. Жастар жиналған мейрамхана іші бір сәтте шат-шадыман болып сала берді. Қоржынға төртінші алтын түсті. Жарайсың, Света!
Рустам АЛПЫСБАЕВ, жанкүйер:
– Міне, Қазақстан тарихында төрт ал­тын медаль иеленген Олимпиада тұңғыш рет болып тұр. Әлем спорт­шыларымыз ар­қылы қазақты танып жатыр. «Тек алтын алатын ел екенсіңдер» деп құттықтап жа­тыр шетелдік доста­рым. Қазақстан аза­маты ретінде, Жеті­судың тұрғыны ретінде мен ауыр атлет қыздарымызбен мақ­та­на­мын! Жеңіс­те­рі­міз көп болсын!
Светлана Николаевна Подобедова 1986 жылы Ресей Федерациясының Ир­кутск облы­сында Зима қаласында дүниеге келген. 2007 жылға дейін Ресей туы астын­да өнер көрсетті. Жасөспірімдер арасында әлем чемпионы, Еуропа чемпионы деген атақтарды 20 жасына дейін алып үлгерді. 2007 жылы РФ ауыр атлетика феде­ра­ция­сымен арадағы келіс­пеушілікке бай­ла­нысты Подобедова құрама сапынан алас­та­тылды. Бұл кезде команда жасақтап жат­қан Алексей Ни Светаны өзіне шақы­рып, өзі жеке бапкер болып жаттығуын бастады. Алайда Ресей Федерациясы келі­сімін бермегендіктен, 2008 жылы Бейжің Олим­пиадасына Подобедова қатыса алмаған еді. Міне, төрт жыл күткен күнге де жетті. Ақы­рында Подобедова мықты екенін мойын­датты. 2010 жылы Светлана Подобедова «Планетаның үздік зілте­мір­шісі» деген атақты иемденгенін де мақтана айтамыз.
Гоянгтағы әлем чемпионатындағы жеңі­­сінен кейін Подобедоваға Талды­қор­ғаннан пәтер берілген. Қазіргі кезде Қас­ке­лең қаласында тұрады.
Жетісулық чемпиондар қазіргі кезде Алматыда тынығып жатыр. Оларды ұлық­тау рәсімі Талдықорғанда 15 тамыз күні өтеді. Алматы облысы әкімдігі зілтемірші аруларға тосын сый дайындап жатқан көрінеді.