Алматы метрополитені

04 тамыз 2011, 12:09

Ел Тәуелсіздігінің 20 жылдығына тарту болатын Алматы метрополитені, шынымен де, егемендіктің жетістігі іспетті. 1988 жылы басталған құрылысты тоқырау жылдары тұралатқан еді. Соңғы 10 жылда құрылыс қайта жанданып, жобаның алғашқы кезегі биыл іске қосылғалы отыр. Жеті стансыдан тұратын 8,56 шақырымдық желінің рельстері төселіп болды, жылжымалы құрамдар жүргізіліп, жолға жаттықтырылып жатыр. Енді бірқатар стансыда әрлеу-сырлау жұмыстары ғана қалып тұр. Алғашқы кезек құрылысы үшін 101 млрд теңге жұмсалды. Бірнеше күн бұрын Елбасы Нұрсұлтан Назарбаев пайдалануға берілетін күні таяған метрополитенде болып, вагондарға отырып, жүріп көрді. Алматы метросы Қазақстандағы тұңғыш, Орталық Азиядағы екінші, ТМД-дағы 16-ыншы жерасты жолы болмақ. Метроның алғашқы желісі Алматы-2 аумағын қамтыса, құрылыстың келесі кезеңінде Алматы-1 теміржол вокзалына жерүсті жолы салынады, ал үшінші желі қаланың Абай даңғылы мен Жароков көшесінің қиылысынан басталып, «Орбита» ықшамауданына және Орталық мәдениет және демалыс саябағына қарай тартылады. Метрополитеннің барлық үш желісінің жалпы ұзындығы 45 шақырымға созылады.