Қыркүйекте 27-ге келеді: Қазақстандықтар депутат Мәди Ахметовті әскерге шақыртуды талап етіп, петиция жариялады

08 тамыз 2022, 16:28

Қазақстандықтар Қорғаныс министрінен ең жас Мәжіліс депутаты Мәди Ахметовті әскерге шақыртуды талап етіп, петиция жариялады, деп хабарлайды Stan.kz ақпарат агенттігі. 

Петицияда Қазақстан Республикасы Конституциясының 36-бабы негіз етіп алынған, яғни заңда белгіленген тәртіпке сәйкес республика азаматтары әскери борыштарын өтеуге міндетті. 

"Парламент мәжілісінің депутаты Ахметов Мәди Абылайұлы 1995 жылдың 18 қыркүйегінде дүниеге келген. Жасы 26-да, әскерге шақырту жасы 18-ден 27 жасқа дейін. Бүгінгі таңда Мәди Ахметов Отан алдындағы борышын өтемеген, әскерде қызмет етпеген. Қорғаныс министрі Руслан Жақсылықовтан азамат Ахметов Мәди Абылайұлын Конституциядағы 36-бап пен "Әскери қызмет және әскери қызметшілердің мәртебесі туралы" заңның 25-бабына сәйкес әскерге шақыруды талап етеміз", – делінген петицияда.