Қазақстандықтар даладағы әжетхананың кесірінен бедеулікке шалдығуда

06 сәуір 2018, 21:51

Қазақстандықтардың бедеулігіне даладағы әжетханалар себеп болуы мүмкін. Бұл туралы NUR.KZ порталы Sputnik Қазақстанға сілтеме жасап хабарлайды.

Кей мектеп оқушылары даладағы әжетханаларды пайдалануға мәжбүр болғандықтан, бедеулікке шалдығуда. Мұндай мәлімдемені "Аман-саулық" қоғамдық қорының президенті Бақыт Түменова сенаттағы парламенттік тыңдалымда жасады.

"Мәселен, мен бедеулік туралы айтқан болатынмын. Бүгінде ересектер түсіктен ғана емес, оқушы кезінде даладағы әжетханаларды пайдалануға мәжбүр болып, бала кезінен ауруын асқындырғандықтан да бедеу болуы мүмкін", - дейді маман.

Ол елімізде некеге тұрған жұптардың 15 пайызы бедеулікке шалдыққандықтан, бір жылға жасанды ұрықтандыруға бөлінген 900 квота жеткіліксіз болатынын алға тартуда.

Айта кетерлігі, жасанды ұрықтандыруды бір рет жасату кемінде 700 мың теңге тұрады.