Коронавирус инфекциясының таралуы бойынша мамырдың басынан бері «сары аймақта» тұрған Ақтөбе облысы жексенбіден бастап қайтадан «қызылға» өтті.
16 мамырда өңір тұрғындарының арасында 70 адамның індетке шалдығуы жағдайды күрт өзгертті.
Әзірге облыстың бас санитарлық дәрігерінің эпидемиологиялық жағдайдың күрт өзгеруіне байланысты жаңа қаулысы шыққан жоқ.
Дегенмен, мектеп оқушылары мен олардың ата-аналары соңғы оқу аптасының қалай өтетініне ерекше алаңдаулы. Өйткені 11 мамырдан бері Ақтөбе қаласы мен аудан орталықтарындағы барлық орта мектептер есіктері қайта ашылып, дәстүрлі оқуға көшкен еді.
Мамыр айының басынан коронавирус індетіне шалдыққандар саны айтарлықтай азайғандықтан, сенбі және жексенбі күндері облыс орталығындағы барлық базарлар мен жабық сауда орындары, моншалар мен сауналар ашылып, дәмханалар мен мейрамханалардың 50 адамға дейін қызмет көрсетулеріне рұқсат етілген болатын.
Мұнымен бір кезде жоғары оқу орындары мен колледж студенттері де дәстүрлі оқу форматына қайта оралып, коронавирус індеті қаупінің азайғандығына тұрғындар сенімді бола бастаған.
Кешелі бері облыс аумағында күн қатты ысып, тұрғындар жаздың ерте басталғанын сезінгендей болды.
Алайда бір күннің ішінде эпидемиологиялық жағдайдың күрт өзгеруі сақтық шараларын сақтамасақ, жұқпалы індеттің қайта асқынатындығын білдірді.
Айта кету керек, 16 мамырдағы жағдай бойынша, «қызыл аймақта» Нұр-Сұлтан, Алматы қалалары, Ақмола, Батыс Қазақстан, Қарағанды, Павлодар, Ақтөбе, Алматы облыстары тұр.