"Қолыңды сындырамын": МҰҚК басшысының депутатпен жанжалы видеоға түсіп қалған

02 маусым 2022, 19:01

2 маусымда болған Жоғары кеңес отырысында Қырғызстан МҰҚК төрағасы Қамшыбек Ташиев пен депутат Адахан Мадумаров жанжалдасқан. Бұл туралы Тengrinews.kz тілшісі 24.kg сайтына сілтеме жасап жазды, - деп хабарлайды Alashainasy.kz тілшісі.

Арнайы қызмет басшысының сөзінен кейін Адахан Мадумаров фракция жетекшісі ретінде жауап беруге 5 минут уақыт беруді сұраған. Спикер Талант Мамытов мәселені дауысқа салған, бірақ әріптестері оны қолдамаған.

 

"Енді не істеу қажет? Неге оның микрофоны үнемі қосылып тұрады?" - деп сұраған Адахан Мадумаров.

 

"Саусағыңызды шошайтпаңыз. Қолыңызды сындырамын", - деп қорқытқан Қамшыбек Ташиев.

 

"Мен саған көрсетемін!" – деп жауап берген депутат.

 

МҰҚК басшысының айтуынша, Адахан Мадумаров мемлекеттік төңкеріс дайындаған.

 

"Бізде ол туыстарымен бірге жаппай тәртіпсіздік пен төңкеріс дайындағаны туралы жедел ақпарат бар. Елдегі билікті ешқашан өзгерте алмайсыз. Сені мемлекеттік төңкеріс үшін отырғызамын. Өткен жолы депутаттар рұқсат бермеді. Сен ел туралы ойламайсың", - деді Қамшыбек Тәшиев.

 

"Істей алмайсың! Күшің жететін нәрсені айт. Төңкеріс жасау үшін қоршаудан секірген жоқпын. Сіз істедіңіз, өзіңіз жауап бересіз", - деді Адахан Мадумаров.

 

"Өзің жауап бересің!", - деді Ташиев.