Қылмыстық топ құрған әйел қолға түсті

08 қазан 2021, 18:43

Ол аптаға созылған «Іздеу» мемлекетаралық операциясы кезінде Ресейдің Челябі қаласында ұсталған, деп хабарлайды Express Qazaqstan.

 

"Іздеу" мемлекетаралық операциясына ТМД елдеріндегі әріптестерімен бірге қостанайлық полицейлер де қатысқан.

 

Облыстық Полиция департаменті бастығының баспасөз хатшысы Ирина Беженарь мәлімдегендей, 7 күн ішінде тәртіп сақшылары ауыр және аса ауыр қылмыс жасаған 17 қылмыскерді анықтап, қолға түсірген. Олардың көбі — есірткі саудасына, сондай-ақ адам зорлау дерегіне қатысы бар күдіктілер. Араларында бірнеше жыл іздеуде болған азаматтар да бар. Мәселен, қостанайлық полицейлер 2013 жылдан бері ойын бизнесін ұйымдастырып, қылмыстық топ құрған және оны басқарған әйелдің дерегін біле алмай келген еді.

 

Челябі облысында қылмыстық іске айыпты саналған 40 жастағы әйел ұсталды. Қазіргі уақытта ол Челябі уақытша ұстау изоляторында қамауда отыр, — дейді Ирина Беженарь.

 

Мұның сыртында, осы кезге дейін іздеу салынған, із-түссіз жоғалып кеткен тағы 5 азаматтың түр-тұлғасы анықталды. Олар Қостанай облысы аумағынан табылды. Өкінішке қарай, бәрі бірдей тірі емес.