Төлеген МҰХАМЕДЖАНОВ, ҚР Парламенті Сенатының депутаты:
.jpg)
Жаңа жылды жеті рет – алаңда, бір рет әуеде қарсы алдым
Жаңа жыл мерекесін қарсы алу біздің қоғамда бұрыннан үрдіске еніп кеткендіктен, бұдан мүлде аттап кете алмаспыз. Біз тек осы мерекені өзіміздің ұлттық болмысымызға икемдей түсуіміз керек. Жалпы, бұл мейрамды атап өту негізінен көптеген қызықты оқиғамен байланысты болады. Кезінде, еліміздің елордасы – Астана қаласы әкімінің орынбасары болып қызмет етіп жүрген кездерімде кейбір мерекелерді қала жұртшылығымен бірге далада бірге атап өтуге тура келетін. Туыстарым мен достарым да бұған үйренген. Сондықтан да қызмет бабыма байланысты сол кезеңдерде жаңа жылды жеті жыл қатарынан алаңда қарсы алуыма тура келді. Өзіммен бірге отбасы мүшелері де бірге жүретін. Бұл да бір қызық дәурен болатын. Алаңда ұйымдастырылатын түрлі мәдени шаралардың басы-қасында жүріп, түнгі сағат 12-де отшашу шашылғаннан кейін үйге бір-ақ қайтатынбыз.
Тағы бір оқиға ойыма оралып отыр. Мәскеудегі П.Чайковский атындағы консерваторияның аспирантурасында оқып жүрген кезім. Жаңа жыл қарсаңында ауа райының қолайсыздығына байланысты ұшағымыз бір күн кешігіп, 31-і күні бір-ақ ұшатын болдық. Бәріміз әуежайда ұшақты күтеміз деп әбден шаршағанбыз. Орнымызға жайғаса салып, көпшілігіміз ұйқыға бастық. Сөйтіп, жаңа жылды әуеде қарсы алдық деуіме болады. Елге 1 қаңтарда келіп қондық. Былайша айтқанда, Мәскеуден Алматыға бір жыл бойы ұшып келгендей болдық.
Бақыт ШАДАЕВА, әнші, Қазақстанның еңбек сіңірген әртісі:
Отшашудың ысына көмілген көлігімді танымай қалдым
.jpg)
Өнер адамы болғандықтан, біз әр мерекені көбіне халықпен бірге өткіземіз. Ал Жаңа жыл жақындаған сайын концерттеріміз тіпті көбейіп кетеді. Біріне барсақ, екіншісіне үлгере де алмай жататын жайымыз бар. Осыдан төрт жыл бұрынғы бір оқиға есіме түсіп отыр. Күндіз ары-бері шапқылап, түрлі шараларға қатысып, кешке жаңа жылды отбасыммен бірге қарсы алуға үйге келдім. Бірақ Алматының орталық алаңында өтетін концертті ұйымдастырушылардың талабы бойынша сағат 12-ден кейін бірінші болып сахнаға шығып, ән айтуым керек болатын. Бір кезде Жаңа жыл сәті таяғанда аулада бірінен соң бірі сарт-сұрт етіп отшашулар атыла бастады. Терезеден қарасақ, бейне бір атыс-шабыс болып жатқандай айналаның бәрі – қызылды-жасылды от пен көк түтін. Содан асығыс-үсігіс жиналып, алаңдағы концертке жетуге асықтым. Бір кезде сыртқа шығып, аулада тұрған көлігімді таба алмай, әбден дал болдым. Біреу айдап алып қашып кетті ме деген де ой келді. Ары айналып, бері айналып жүріп, әйтеуір, көлігімді нөмірі бойынша әрең танып алдым. Әрең таныдым деген себебім, менің аппақ темір тұлпарымның тура жанында тұрып, біреулер артынан көп күл шашып қалдыратын үлкен отшашу атса керек. Содан ақ көлігім қап-қара ысқа көміліп қалыпты. Көлігімді қыздырып, алаңға жетсем, концерт ортасына таяп қалыпты. Ұйымдастырушылар «қайда жүрсің, концертті сен ашуың керек еді ғой» деп ренжиді. Болған жайды айтып едім, бәрі де мәз-мейрам болып, бір күліп алды.
Қалқаман САРИН, ақын:
Шырша тойы менің туған күнімнің көлеңкесінде қалып қоятын сияқты
.jpg)
Өз басым Жаңа жыл мерекесін сонша күтіп, ерекше бір жағдайда атап өткен емеспін. Меніңше, бұл мерекені шырша тойы, қыс мерекесі деп атасақ та болады. Ал менің басымнан бұл мейраммен байланысатын аса бір қызықты оқиғалар өте қойған жоқ. Мұның тағы бір себебі бар. Өйткені жаңа жыл келе салысымен, 2 қаңтарда туыстарым, достарым туған күнімді атап өту үшін біздің үйге жиналады. Оған да аса дайындалмаймыз. Жаңажылдық дастарқан мәзірінен қалған-құтқан дәмнің ретін келтіріп, өзімізше бір мәре-сәре болып жатамыз. Жаңа жыл кештерінің өзінде айналамдағылар мені туған күніммен алдын ала құттықтап, абыр-дабыр басталып кетеді. Кейбір достарым «жылда Тәуелсіздік мерекесі Жаңа жыл жылтырақтарының аясында еленбей жатады, бірақ Жаңа жыл сенің туған күніңнің көлеңкесінде қалып қояды» деп қалжыңдап отырады. Сондықтан да бұл мереке кезінде мен басқалар сияқты еркін қыдырыстап, қонаққа бара алмаймын. Себебі өзімнің қонақ күтуіме тура келеді. Анығын айтсам, әр Жаңа жыл менің есімде туған күнімді тойлаумен есте қалады. Ал нағыз жаңа жылды негізінен Наурызда бар ынта-ықыласыммен қарсы аламын.