ЖОО-ға грант: Қазақстанда мерзімді әскери қызметтің беделін арттыру мәселелері қаралды

16 маусым 2022, 08:44

Қорғаныс министрлігінде генерал-лейтенант Сұлтан Қамалетдиновтың төрағалығымен өткен ведомствоаралық кеңесте мерзімді әскери қызметтің беделін арттыру мәселелері қаралды, деп хабарлайды Azattyq Ruhy. 

 
Кеңеске Мемлекеттік күзет қызметінің, ҰҚК Шекара қызметінің, Ұлттық ұланның, Бас әскери прокуратураның және республиканың басқа да мүдделі министрліктері мен ведомстволарының өкілдері қатысты,

Қорғаныс министрінің орынбасары Мемлекет басшысы қойған міндеттерді іске асыру үшін білім беру секторында жеңілдіктер, қосымша төлемдер және мерзімді әскери қызмет өткрген адамдар үшін басқа да артықшылықтар беруді көздейтін заңнамалық актілерге 30-дан астам түзетулер әзірленгенін атап өтті.

«Түзетулер ішінде-мерзімді әскери қызмет өткерген жастарға және «Жас сарбаз» әскери-патриоттық сыныптарының түлектеріне жоғары оқу орындарына түсу үшін квота беру де бар. Осы мақсат үшін бөлінетін грантты 3000-нан асыру мүмкіндігі қарастырылуда. Бұдан өзге, түзетулерде бұрын мерзімді әскери қызмет өткерген жоғары оқу орнының түлектерін міндетті үш жылдық еңбектен босату көзделіп отыр», - делінген хабарламада
Сонымен қатар, мерзімді әскери қызметке шақырудан кейінге қалдырылған азаматтардың санын қысқарту және қызмет өткеруден жалтарған адамдарды жұмысқа орналастыру мүмкіндігін шектеу де жоспарланып отыр.

Қорғаныс министрлігінде мерзімді әскери қызметті өткерудің беделін мен тартымдылығын арттыру бойынша қабылдайтын шараларды одан әрі талқылау мемлекеттік органдардың ескертулері мен ұсыныстарын назарға ала отырып, белгіленген тәртіппен жалғаса береді.