Қарамағындағыларға күш көрсеткен полиция басшысы қызметінен қуылды

14 желтоқсан 2022, 19:02

Түркістан облысында қызметтік этиканы сақтамаған полиция бөлімі басшысының орынбасары қызметінен босады. Әлеуметтік желіде кеңінен талқыланған полицейдің әрекетіне қатысты шешім қабылданды. Қызмет бабында шорти, майкамен келе жатқан ол алдынан шыққан формадағы қызметкердің бірін қолымен нұқып жіберген, - деп хабарлайды Alashainasy.kz тілшісі Аikyn.kz-ке сілтеме жасап.

Кейіннен Түркістан облысы полиция департаменті этиканы сақтамаған Қазығұрт аудандық полиция бөлімі басшысының орынбасарына қатысты тексеру басталғанын мәлімдеген болатын.

 

Заң аясында жүргізілген комиссия отырысының қорытындысы бойынша бейнежазбадағы басшының орынбасары қызметтен босатылды. Сонымен қатар қазіргі таңда аталған жайт бойынша ҚР ҚК-нің "Билікті немесе лауазымдық өкілеттіктерді асыра пайдалану" 362-бабымен сотқа дейінгі тергеу жүргізілуде.

 

Бұл туралы Түркістан облысы полиция департаментінің бастығы Мұрат Қабденов мәлімдеді.

 

«Әлеуметтік желіде желдей ескен полицейдің іс-әрекеті жайлы жазбалар бойынша тиісті шаралар қабылданып жатқанын баршаңызға жеткізген едім. Сол шаралардың бастамасымен бөлісуді жөн деп отырмын. Себебі нақты қолданылып жатқан жұмыстардан сіздердің хабардар болуларыңыз, полицияның ашықтығын білдіреді» – деді полиция генерал-майоры.