"Қылмыс әлемімен араласып кетпеуі үшін": Сенат депутаты сотталған радикалдарды бөлек камераларға қамауды ұсынды

20 қаңтар 2022, 13:37

ҚР сенат депутаты Андрей Лукин үкіметті түзеу мекемелеріндегі діни экстремизмге қарсы тұру және оның қылмыс әлемімен ішінара араласып кетуіне жол бермеу шараларын қабылдауға шақырды, деп хабарлайды Stan.kz ақпарат агенттігі.

Оның айтуынша, радикалдық ұйымдар Қазақстанның ұлттық қауіпсіздігіне, әсіресе пенитенциарлық жүйеге төнетін қатерлердің бірі екенін естен шығаруға болмайды.

"Биылғы жылдың 1 қаңтарындағы жағдай бойынша еліміздегі қылмыстық-атқару жүйесінде 500-ден астам діни және террористік ұйымдардың жетекшілері мен мүшелері қамауда отыр. Қылмыстық-атқару жүйесінің бас бостандығынан айыру түріндегі жазасын өтейтін 64 мекеменің тек тоғызында ғана камералық бақылау бар және олардың ішінде республикадағы сотталғандардың жалпы санының 18,3%-ы отыр", - деді Андрей Лукин өзінің депутаттық сауалында.

Сенатордың сөзінше, қолданыстағы мекемелер негізінен өткен ғасырдың 30-70-жылдары салынған казармалық үлгідегі құрылыстар негізінде тұрғызылған.

"Мұндай жағдайда бір казармада 100-ге жуық сотталғандар отырған кезде тәрбие жұмысы туралы сөз болуының өзі қиын, өйткені түрме субмәдениетінің және қылмыстық ортаның бірнеше ықпалы оның бүкіл процесін жоққа шығарады", - деп қосты сенат депутаты.

Андрей Лукин, ең алдымен, радикалды көзқарастағы сотталған азаматтарды камераға қамауды қамтамасыз ету үшін қолданыстағы мекемелерді қайта құруды ұсынды.

Сонымен қатар ол түзеу мекемелеріндегі қауіпсіздікті қамтамасыз етудің тиімділігін және қауіпсіздік деңгейін өлімге әкелмейтін қарумен және арнайы құралдармен, соның ішінде радиобайланыс құралдарымен, техникалық қауіпсіздік құралдарымен, ұялы байланысты блоктау жүйелерімен жарақтандыру арқылы арттыруды ұсынды.

Депутат сондай-ақ колонияларда ұялы телефондарды скринингтік құрылғылармен жабдықтау арқылы заңсыз пайдаланылуына бақылауды күшейту қажеттігін жеткізді.