«Мұғалімдерді көше сыпыруға жіберген шенеуніктер жауапқа тартылады» – Асхат Аймағамбетов

18 қазан 2021, 09:53

Білім және ғылым министрі Асхат Аймағамбетов Семей қаласында көше сыпырған мұғалімдердің құқы қорғалатынын айтты.

Бұл туралы министр Facebook-тағы парақшасында жазды.
Оның айтуынша, Семей қаласында оқу процесіне кедергі келтіріп, мұғалімдерді көше сыпыруға жіберген. Шамасы, мұндай тапсырманы қала әкімінің орынбасары беріп, осындай мазмұндағы хат мектептерге таратылған.

«2019 жылдың желтоқсанында қабылданған Заң шеңберінде педагогтерді өзіне тән емес функцияларға тартуға тыйым салынады. Содан бері мұғалімдер тек тікелей функционалдық міндеттермен айналысуы керек екенін түсіну үшін уақыт жеткілікті болды.

Мұндай бұзушылықтар үшін екі жүзге жуық басшы жазаланды. Олар тәртіптік және әкімшілік жауапкершілікке тартылып, тіпті жұмыстан шығарылды.

Семей қаласындағы оқиғаға байланысты білім беру саласындағы сапаны қамтамасыз ету департаменті әкімшілік іс қозғап, тексеру жүргізіліп жатыр. Қала әкімі орынбасарының бұл жағдайға қатыстылығы расталған жағдайда, аталған лауазымды тұлға және өзге тұлғалар әкімшілік жауапкершілікке тартылады. Біз, сондай-ақ, қажетті шаралар қабылдау үшін Мемлекеттік қызмет істері агенттігіне жүгінеміз. Сонымен қатар қалалық білім бөлімінің басшысы да жауапқа тартылады», – деп жазды Асхат Аймағамбетов.

Бұған дейін мұғалімдердің көше сыпыруына қатысты Білім басқармасы түсінік бергенін жазған болатынбыз.