"Неге біреудің дүниесіне жабысамыз": Вице-премьер Pfizer вакцинасын салғызғысы келетіндерге ренжіді

22 ақпан 2022, 17:17

Премьер-министрдің орынбасары Ералы Тоғжанов қазақстандықтарды отандық вакцинаны қолдауға үндеді, деп хабарлайды Stan.kz ақпарат агентігі.

"Қазақта "Көршінің тауығы семіз көрінеді" деген жақсы сөз бар. "Қолда барда алтынның қадірі жоқ", өз вакцинамыз да керемет қой. Өзім салдырып алдым. QazVac-тың тиімділігі – 86 процент. Соны неге пайдаланбаймыз? Неге біреудің дүниесіне жабысамыз?", - деді Тоғжанов журналистерге берген сұхбатында.

Короновирустың таралуына жол бермеу жөніндегі ведомствоаралық комиссияның төрағасы қазақстандық вакцинаның барлық құжаты бар екенін және Дүниежүзілік денсаулық сақтау ұйымы тиісті есебін қабылдағанын еске салды. Оның айтуынша, қазір бір ғана процедура қалған. Содан кейін қазақстандық вакцина барлығымен бір деңгейде тұрады.

"Қазір Pfizer-ді салдыра алатын адамдардың санатын анықтадық. Ал бәріне салдыратын болсақ, өз вакцинамызды не үшін шығарып отырмыз? Онда ештеңе шығармай-ақ қояйық, бәрін сырттан сатып алайық. Өзімізді қашан сыйлаймыз? Қашан өзімізді көтереміз? Қашан намысымызды өзіміз қорғаймыз? Жоқ, бәріміз Pfizer-ді іздейміз", - деп ренжіді Тоғжанов.

Осы орайда вице-премьер қандай екпемен ревакцинация жасайтынын да айтты.

"Мен әлі салдырған жоқпын. Жақында қаңтар айында ауырдық. Енді алты айдай өтуі керек. Сол кезде салдырамыз. QazVac-ты алу керек ", - дейді Тоғжанов.